Bas prokýratýra alaıaqtardy anyqtaýǵa jasandy ıntellektini iske qosty
ASTANA. KAZINFORM — Jasandy ıntellekt kómegimen 38 alaıaqtyq saıt buǵattaldy, dep habarlaıdy Bas prokýratýranyń baspasóz qyzmeti.
Bas prokýratýranyń Quqyqtyq statıstıka jáne arnaıy esepke alý komıteti bazasynda qurylǵan Qylmystyq qaýipterdi boljaý ortalyǵy úlken derekterdi, vedomstvoaralyq aqparat almasýdy jáne jasandy ıntellekt quraldaryn paıdalaný arqyly syrtqy jáne ishki qaýipterdiń aldyn alý jónindegi usynymdar qamtylǵan 192 aqparattyq hatty memlekettik organdarǵa joldady. 38 alaıaqtyq ınternet-resýrs buǵattaldy.
Sonymen qatar buqaralyq aqparat quraldary arqyly halyqqa alaıaqtyqtyń jańa tásilderi men saqtyq sharalary jóninde turaqty túrde aqparat berilip keledi — azamattarǵa arnalǵan 16 eskertý jarııalandy.
Ortalyq engizgen sheshimderdiń qatarynda medıakeńistik pen ınternet-alaıaqtyqtardy monıtorıngteý júıeleri, «e-Ótinish» júıesindegi azamattardyń ótinishterin taldaý, sondaı-aq kóshedegi jáne qaıtalama qylmystylyqty boljaý modelderi bar.
— Sonymen qatar Bas prokýratýra Іshki ister mınıstrligimen birlesip qylmystyq isterdi tergeý protsesine jasandy ıntellekt engizý jobasyn iske asyryp jatyr. Pılottyq joba Astana qalasy men Aqmola oblysynyń birqatar polıtsııa bólimshesinde júzege asyrylyp keledi. Joba aıasynda tergeýdi josparlaý, jaýaptardy transkrıptsııalaý jáne taldaý, sondaı-aq protsestik qujattardy avtomatty túrde qalyptastyrý modýlderi engizildi, — delingen vedomstvo taratqan aqparatta.
Jalpy «Tsıfrlyq kómekshi» modýlderi arqyly 231 tergeý jospary, 72 jaýap alý hattamasy, 65 aıyptaý aktisi jáne qylmysty saralaý týraly 15 qaýly qalyptastyryldy.
Quqyq qorǵaý salasyndaǵy tsıfrlyq quraldardy damytý Memleket basshysy jarııalaǵan Tsıfrlandyrý jáne jasandy ıntellekt jyly aıasynda júzege asyrylyp jatyr.
Bas prokýratýra «Zań men tártip» qaǵıdattaryn nyǵaıtý, qoǵamdyq qaýipsizdik deńgeıin arttyrý jáne tıimdi «Halyq únine qulaq asatyn memleket» qurý maqsatynda tsıfrlyq sheshimderdi damytý jumysyn jalǵastyrady.
Osyǵan deıin Prokýratýra men sybaılas jemqorlyqqa qarsy qyzmetke qabyldaý erejesi ózgerýi múmkin ekenin jazǵanbyz.
