Bas Prokýratýra aqbóken múıizin satyp alý týraly habarlandyrýlar boıynsha tergeýge deıingi tekserýlerdi júrgizýge bastama jasady
ASTANA. 18 qańtar. QazAqparat - «Aqbókender sanynyń azaıýyna, sondaı-aq kóptegen múıizderi kesilgen ushalardy tabý faktileriniń anyqtalýyna baılanysty Bas Prokýratýra aqbóken múıizin satyp alý týraly
habarlandyrýlar boıynsha tergeýge deıingi tekserýlerdi júrgizýge bastama jasady»,-dep habarlaıdy vedomstvonyń baspasóz qyzmeti.
Іshki ister organdarynyń tekserýleri barysynda aqbóken múıizderiniń qaıdan jáne qalaı alynǵany anyqtalady jáne qylmystyq jazalaý belgileri bolǵan jaǵdaıda kináli adamdar jaýapkershilikke tartylatyn bolady. Bul baǵyttaǵy jumystar sondaı-aq tájirıbelik qyzmetke jasalǵan taldaý saraptama qyzmetindegi keıbir kemshilikterdi anyqtaýǵa múmkindik berdi. Jekelegen óńirlerde sarapshylardyń bolmaýy saldarynan jekelegen ekologııalyq saraptamalar júrgizilmeıdi, sol sebepti dáleldemelerdi der kezinde anyqtaý jáne jınaý qıyndyq týdyrady. Osyǵan oraı Ádilet mınıstrligine saraptama qyzmetin jetildirý týraly usynys engizildi. Aýmaqtyq prokýrorlarǵa qadaǵalaýdy kúsheıtip, ekologııalyq qylmystar týraly qylmystyq isterdi tergeýge deıingi tekserý men tergeýdiń sapaly júrgizilýin qamtamasyz etý tapsyryldy.
