Bas prokýratýra «Abaı» shahtasynda oryn alǵan jarylystan qaza tapqan shahterdiń jesiriniń quqyǵyn qorǵady
ASTANA. Mamyrdyń 27-si. QazAqparat /Marlan Jıembaı/ - QR Bas prokýratýrasy Qaraǵandy oblystyq sotynyń sheshimine qadaǵalaý narazylyǵyn bildirý arqyly «Abaı» shahtasynda oryn alǵan jarylystan qaza tapqan Omarovtiń jesiriniń quqyǵyn qorǵady.
Bul týraly búgin QR Bas prokýratýrasynyń resmı ókili Nurdálet Súıindikov BAQ ókilderimen bolǵan baspasóz máslıhaty barysynda málim etti.
Onyń aıtýynsha, birinshi jáne apellıatsııalyq satydaǵy sot aryzdanýshy Jaqsylyqovanyń qaıtys bolǵan kúıeýiniń asyraýynda boldy degen mańyzdy faktini anyqtaý týraly aryzy negizsiz qanaǵattandyrylmaǵany anyqtalǵan. Bul faktini anyqtaý keıbir áleýmettik tólemderdi alý úshin qajet bolǵan.
«Bas prokýrordyń narazylyǵymen Joǵarǵy sottyń qadaǵalaý alqasy tómengi sot sheshiminiń kúshin joıyp, A.Jaqsylyqovanyń aryzyn qanaǵattandyrý týraly jańa sheshim shyǵardy», dedi ol.
