Bas prokýratýra 8 naýryz qarsańynda alaıaqtyq faktileri týraly eskertti
ASTANA. KAZINFORM – 8 naýryz merekesi qarsańynda alaıaqtar azamattardyń merekelik qarbalasqa baılanysty belsendiligin, gúlder men syılyqtarǵa tapsyrystardyń kóbeıýin, sondaı-aq onlaın-tólemderdiń artýyn paıdalanyp, olardyń aqshalaı qarajaty men jeke derekterine qol jetkizýge tyrysady. Bul týraly Qazaqstan Bas prokýratýrasynyń baspasóz qyzmeti habarlady.
Bas prokýratýra kezekti ret eskertedi: mereke kezeńinde alaıaqtar azamattarǵa túrli syltaýlarmen qońyraý shalyp, habarlamalar jiberýi múmkin.
Eń kóp taralǵan tásilder:
• gúl nemese syılyq jetkizý rásimdelgeni týraly habarlap, «tapsyrysty rastaý úshin» SMS-kodty aıtýyn suraý;
• jalǵan utys, bonýs nemese aktsııa týraly habarlap, telefonǵa kelgen rastaý kodyn ataýdy talap etý;
• ózderin bank qyzmetkeri, qaýipsizdik qyzmetiniń ókili nemese kýrerlik kompanııa qyzmetkeri retinde tanystyrý.
– Bir rettik SMS-kod qarjylyq operatsııalardy rastaýǵa arnalǵan qupııa qural ekenin este ustaǵan jón. Mundaı kodty úshinshi tulǵalarǵa berý aqshalaı qarajattyń esepten shyǵarylýyna, nesıe rásimdelýine nemese bank qosymshańyzǵa qol jetkizilýine ákep soǵýy múmkin. Bankterdiń qyzmetkerleri de, quqyq qorǵaý organdary da telefon arqyly SMS-kodtardy, qupııa sózderdi jáne bank kartasynyń derekterin suratpaıdy.
Nazar aýdaryńyzdar, keıbir jaǵdaılarda taýarlardy nemese bank ónimderin resmı jetkizý kezinde rastaý kody shyn máninde qoldanylady. Alaıda ol tek siz aldyn ala rásimdegen tapsyrys boıynsha, jetkizýdi kútip otyrǵan jaǵdaıda jáne taýardy alǵanyńyzdy rastaý úshin paıdalanylady. Eger jetkizý týraly qońyraý nemese habarlama kútpegen jerden kelip, sizden kodty aıtý suralsa, áńgimeni dereý toqtatý qajet, - delingen habarlamada.
Sonymen qatar mereke qarsańynda alaıaqtar áleýmettik jelilerde, onyń ishinde Instagram jáne TikTok platformalarynda jalǵan paraqshalar ashyp, gúlder men basqa da taýarlardy aıtarlyqtaı tómen baǵamen, iri jeńildiktermen jáne aktsııalarmen usynyp, aldyn ala tólem talap etedi. Aqsha alǵannan keıin mundaı paraqshalar qyzmetin toqtatyp, satýshymen baılanys múmkin bolmaı qalady.
Gúlder men syılyqtardy tek senimdi satýshylardan tapsyrys berýge, tólem jasaǵan kezde alýshynyń derektemelerin muqııat tekserýge, kúmándi siltemelerge ótpeýge jáne qandaı jaǵdaı bolmasyn bógde adamdarǵa SMS-kodtar men bank derekterin bermeýge keńes beriledi. Kúdik týyndaǵan jaǵdaıda bankke resmı nómir arqyly ózińiz habarlasyp, qajet bolǵan kezde quqyq qorǵaý organdaryna dereý júgingen jón.
Buǵan deıin habarlaǵanymyzdaı, 1414 nómiri arqyly jasalatyn alaıaqtyq kóbeıgen.
