Bas prokýratýra: 70 myńnan astam azamattyń 6,2 mlrd. teńge jalaqylarynyń tólenýi qamtamasyz etildi

ASTANA. QazAqparat - Azamattardyń eńbek quqyqtarynyń saqtalý jaǵdaıy, onyń ishinde jalaqylarynyń ýaqtyly tólenýi prokýratýra organdarynyń únemi baqylaýynda.

Aǵymdaǵy jyly engizilgen prokýrorlyq qadaǵalaý aktileriniń nátıjesinde 70 myńnan astam azamattyń 6,2 mlrd. teńge jalaqylarynyń tólenýi qamtamasyz etildi, dep habarlaıdy Bas prokýratýranyń baspasóz qyzmeti.

Mysaly, Qostanaı oblystyq prokýratýrasynyń usynysy negizinde «Azııa Altyn 2000» JShS-men 2015 jyldyń qyrkúıek aıyna tıesili 95 jumysshynyń 9,2 mln. teńge jalaqysy tólendi.

Batys Qazaqstan oblysy prokýrorynyń uıǵarymymen «Satbor» JShS-nen 72 jumysshynyń aldynda qalyptasqan 12 mln. teńge jalaqysynyń tólenýine qol jetkizilgen.

Jalpy, aǵymdaǵy jyly qoldanylǵan sharalar nátıjesimen 156 uıymdaǵy qaryzdar tolyq ótelgen. Sonymen qatar, jekelegen uıymdarda qaryzdardyń uzaq merzimde ótelmegenin atap ótken jón.

Mysaly, «SPK Kvant» JShS jumysshylarynyń aldyndaǵy qaryzdary 2010 jyldan, «Gesheft-21» JShS - 2011 jyldan jáne «QazAvto-Trans» JShS - 3 jyldan astam ýaqyt boıy qalyptasqan.

Bul baǵyttaǵy jumystar jalǵasýda jáne únemi baqylaýǵa alynǵan.