Bas prokýratýra: 2017 jyly bitimgershilik ınstıtýtyn damytý arqyly sot isterin 30 paıyzǵa azaıtý kózdelýde
Bul týraly búgin atalmysh jobany talqylaýǵa arnalǵan halyqaralyq konferentsııada QR Bas prokýrory Ashat Daýylbaev málim etti.
"Bitimgershilik ınstıtýtyn qurý maqsatynda biz sot, prokýratýra jáne ádilet organdarynyń kúshin biriktirdik. Onyń qorytyndysy - qylmystyq jáne azamattyq protsessterdegi "Bitimgershilik" tujyrymdamasy jobasynyń jasaqtalýy boldy. Tujyrymdamanyń negizgi aspektisi daýlardy sheshý júıesinde bitimge kelý protsedýralaryn jáne sot aldyndaǵy tetikterdi keńinen qoldanýdy kózdeıdi", - dedi A.Daýylbaev.
Onyń sózine qaraǵanda, bitimgershiliktiń tıimdiligi basym. Sebebi taraptardyń, sot organdarynyń ýaqyty, qarajaty únemdeledi, bitimge kelgen taraptardyń arasyndaǵy adamdyq nemese qyzmettik qarym-qatynastar saqtalady, bedelderine nuqsan keltirilmeıdi.
"Qazaqstanda azamattyq isterdiń tek 3 paıyzy ǵana bitimmen aıaqtalady. Sotsyz, medıatsııa arqyly daýlardy sheshý tetigi bizde keń paıdalanýǵa engen joq. Shetelde daýlardyń aýqymdy bóligi sotsyz sheshimin taýyp jatady. Máselen, AQSh-ta - 97 paıyz, Ulybrıtanııada - 87 paıyz, Eýropanyń Slovenııa syndy elinde daýlardyń 40 paıyzy bitimgershilikpen sheshiledi", - dep atap ótti Bas prokýror.
A.Daýylbaevtyń aıtýynsha, 2017 jyly bitimgershilik ınstıtýtyn damytý arqyly sot isterin 30 paıyzǵa azaıtý kózdelýde.
