Bas prokýratýra 18 qazaqstandyq jeke JOO-ny lıtsenzııasynan aıyrýdy usyndy

ASTANA. QazAqparat - Búgin Bas prokýratýra alqasynyń otyrysy ótti. Onda jeke JOO-larda bilim berýdegi zańnamanyń saqtalýy sóz boldy.

Bas prokýratýranyń tekserisi keı memlekettik emes joǵary oqý oryndary bilim berý men kásibı mamandardy daıarlaýǵa qoıylatyn talaptarǵa jaýap bermeıtinin kórsetti, dep habarlady QR Bas prokýratýrasynyń baspasóz qyzmetinen.

Bas prokýror Ashat Daýylbaev atap ótkendeı, anyqtalǵan zań buzýshylyqtar Ǵylym jáne bilim berý salasyn baqylaý komıtetiniń tıisti tekserý júrgizbeıtinin ańǵartty.

Tekseris nátıjesinde prokýrorlar 62 eskertý jasady, sonyń ishinde 18 jeke JOO-nyń lıtsenzııasynyń kúshin ýaqytsha toqtatý týraly uıǵarymy bar. JOO-lardyń 40 qyzmetkeri tártiptik jaýapkershilikke, 32-si - ákimshilik jaýapkershilikke tartyldy. 2 qylmystyq is qozǵaldy.

Aýmaqtyq prokýrorlarǵa anyqtalǵan olqylyqtardy joıý boıynsha qadaǵalaý júrgizýdi kúsheıtý tapsyryldy.