Bas múftıge paıǵambardyń (s.ǵ.s.) múbárak saqaly tapsyryldy
ASTANA. 23 mamyr. QazAqparat -Aqmola oblysy Atbasar aýdany Sadovyı aýylynan paıǵambarymyz Muhammedtiń múbárak saqaly tabyldy. Bul týraly QMDB baspasóz qyzmetinen habarlandy.
Osy aýyldyń turǵyny 85 jastaǵy Fatıma áje Ábdibekqyzy ata-babalary amanattap ketken tábárikti saqtap kelipti. Jýyrda ol «kózim tiri kezde Bas múftıge amanattap, tabystaıyn» degen nıetpen dinı basqarmaǵa arnaıy keldi. Qazaqstan musylmandary dinı basqarmasynyń tóraǵasy Erjan qajy Malǵajyulyna analyq batasyn berip, qundy jádigerdi qolyna ustatty.
«Aınalaıyn, Erjan balam! Áýeli jańa qyzmetińmen quttyqtaımyn. Jumysyńa Alla jar bolǵaı, qaraǵym! Men ózińe babam Bókeı qajy Sandybaıulynan qalǵan úlken amanatty tabystaǵaly otyrmyn. Ony ákem marqum Ábdibek qaıtys bolar aldynda urpaǵyna berdi. Ata-babalarym saqal-shárıfti kóziniń qarashyǵyndaı qorǵap, saqtady. Olar dinge qysym kórsetilgen talaı qıyn zamanda da ımanyn saqtap, namazyn tastamady. Osy saqaldy, dinin saqtap qalý úshin Bashqurstanǵa da kóshken. Qolymdaǵy asyl jádigerdi kózim tiri kezde ózińe amanat etip otyrmyn», - dedi Fatıma áje Ábdibekqyzy Bas múftımen kezdesýde. Qarııa saqaldy berer aldynda kóz jasyna erik berdi. Qımaı-qımaı amanattap, tabystady.
Bas múftı baǵa jetpes jádigerdi qasterlep, saqtap kelgen ájege alǵysyn bildirip: «Bul - ata-babalarymyzdyń dinge berik bolǵanynyń aıǵaǵy ǵoı. Paıǵambardyń (s.ǵ.s.) kózin kórgen sahabalar odan tábárik, tálim alyp qalýǵa tyrysqan. Sebebi, olar Alla elshisin (s.ǵ.s.) qatty jaqsy kórgen. Bizge, Qazaqstan musylmandaryna buıyrǵan bul jádiger qaıyrly da qutty bolǵaı», - dedi. Erjan qajy Malǵajyuly.
Múbárak bir tal qara saqaldyń paıǵambarymyz Muhammedke (s.ǵ.s.) tán ekenin aıǵaqtaıtyn arnaıy mór basylǵan tarıhı qujaty da bar. Onda: «Men bul múbárak saqaldy 1921 jyly mart aıynda Iýrteke qajydan aldym. Alǵan adamnyń aty Bókeı qajy Sandybaıuly. Bókeı qajy qaıtys bolǵannan keıin onyń uly Ábdibek aldy. Bókeı qajynyń qaıtys bolǵan jyly 1924 jyldyń fevral aıy», - delingen. Dinı basqarmanyń ǵalymdary osy qujatty qazaq jáne orys tilderine aýdardy. Saýd Arabııasynyń bir top sarapshylary da paıǵambarymyzdyń (s.ǵ.s.) saqaly ekenin rastady.
Bir tal saqal shyny ydystyń ishine saqtalyp, eki jaǵy kúmispen kúptelgen. Uzyndyǵy 3 sm.
