Bas múftı tórt tilshige Umra qajylyǵyna joldama tabystady
ASTANA. 26 maýsym. QazAqparat - Qazaqstan musylmandary dinı basqarmasy baspasóz kúni merekesi qarsańynda bas redaktorlardyń basyn qosyp, alqaly jıyn ótkizdi. Onyń barysynda ıman, ıba, adamgershilik,izgilik taqyrybynda qalam terbep júrgen tilshiler men esimi elge belgili qalamgerler dástúrimizben biteqaınasqan dinimizdi buqaralyq aqparat quraldary arqyly nasıhattaýdyń máni men mańyzy, joly men júıesi jaıly pikir almasty.
Bas redaktorlar basqosýynda Bas múftı Erjan qajy Malǵajyuly jýrnalısterdi ortaq maqsat, izgi nıet jolynda birge qyzmet etýge shaqyrdy. Bul týraly Qazaqstan musylmandary dinı basqarmasynyń baspasóz qyzmetinen habarlandy.
Dinı basqarmadaǵy dóńgelek ústelge belgili jýrnalıst-jazýshylar, qalamgerler - Jumabek Kenjalın, Samat Ibraım, Júsipbek Qorǵasbek, Marat Toqashbaev, Qorǵanbek Amanjolov, Ermahan Shaıhyuly, Sársenbek Bekmuratuly, Bekjan Áshirbaevtar, t.b. Qatysty. Zııaly qaýym ókilderi dinı basqarmanyń jumysyn baspasóz arqyly nasıhattaýdyń tıimdi joldary týraly oılaryn ortaǵa saldy. Marat Toqashbaev áriptesterin Islamdy qaralaý maqsatynda jarııalanǵan aqparattardy súzgiden ótkizip, túrli «ızmderden» aýlaq bolýǵa úndedi.
«BAQ - Dinı basqarma men halyqty jaqyndatatyn altyn kópir dep bilemin. Olaı deıtinim, elimizde on alty mıllıon adam bolsa, olarǵa bir mezette aıtqan sózimizdi jetkizetin telearnalar men radıolar ekeni sózsiz. Mundaı múmkinshilik bizderge bergen úlken nyǵmet. Áıgili qolbasshy Napoleon Bonaparttyń: «Men alty qatar áskerden emes, alty bettik gazettiń ıdeologııasynan qorqamyn», - deýi gazettiń mańyzdy ról atqaratynyn aıǵaqtaıdy. Ahmet Baıtursynuly atamyzdyń «Qazaq» gazetin shyǵarýy da halyqty izgilikke, jaqsylyqqa shaqyrýdan týǵan ıgi maqsat edi. Olaı bolsa, barshańyzdy eldiń ıgiligi jolynda birlese qyzmet etýge shaqyramyn. Tól merekelerińiz qutty bolsyn. Alla taǵala jumystaryńyzǵa bereke berip, izgi isterińizdi saýaptan jazǵaı!» - dedi júzdesý barysynda Bas múftı Erjan qajy Malǵajyuly.
Іs-shara barysynda Bas múftı ımandylyqty, izgilikti buqaralyq aqparat quraldary arqyly nasıhattap júrgen belgili qalamger, din janashyry Nurlytaı Úrkimbaıǵa, «Qazaqstan» telearnasynyń telejúrgizýshisi Esbolat Aıdabosynǵa, «Ulan» gazeti bas redaktorynyń orynbasary Serikbol Hasanǵa, Almaty qalasy Ortalyq meshitiniń www.azan.kz saıtynyń bas redaktory Talǵat Balgereıge Umra qajylyǵynyń sertıfıkatyn tabystady.
