Bas múftı shákirtterdi qyzmetke bóldi
ASTANA. 18 mamyr. QazAqparat - Búgin Qazaqstan musylmandary dinı basqarmasy jáne Orta Azııa múftıler keńesiniń tóraǵasy, Bas múftı, sheıh Ábsattar qajy Derbisáli Almatydaǵy respýblıkalyq «Ábý Hanıfa» medresesin bitirgen shákirtterdi qyzmetke bóldi. Bul jaıynda QMDB saıtynda jarııalanǵan.
QMDB-na qarasty ıslamı oqý ordasynyń «Islamtaný» mamandyǵy boıynsha bıyl 13 shákirt bilim nárimen sýsyndady. Jan-jaqty jaǵdaı jasalǵan medreseden túlep ushqan shákirtter jer-jerdegi meshitterge qyzmetke taǵaıyndaldy. Dinbasy bolashaq din qyzmetkerlerine batasyn berip, shákirtterdi dinge adal qyzmet etýge shaqyrdy. «Alla Taǵala alǵan bilimderińizge saı amal etýdi, elimizdiń ıgiligi men bolashaǵy úshin erinbeı qyzmet etip, asyl dinimiz Islamdy danalyqpen nasıhattaýdy násip etsin!» - dep duǵa jasady Bas múftı.
