Bas múftı Ramazan aıynda azyq-túlik baǵasyn arzandatýǵa úndedi

ASTANA. QazAqparat — Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Ramazan aıynda azyq-túlik baǵasyn 10 paıyzǵa arzandatýǵa úndedi, dep habarlaıdy QazAqparat tilshisi.

«Kásipker azamattardy, saýda ortalyqtarynyń basshylaryn qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa úndeımin. Jaqsy amaldaryńyz ózderińizge eselep jaqsylyq bolyp qaıtatynynda kúmán joq. Mundaıda halqymyz: «Qaıyrymdylyq jasasań – qaıyryn óziń kóresiń» demeı me?!», - dedi Bas múftı BAQ ókilderine arnalǵan baspasóz máslıhatynda.

Sonymen qatar ol barsha qaýymǵa qasıetti Ramazan aıynda araq-sharap ishilmese jáne dúkenderde satylmasa, múmkindiginshe qudaıy astar keshki aýyzashar ýaqytynda ótkizilse degen tilegin jetkizdi.

Eske salsaq bıyl Ramazan aıy 23 naýryzda bastalady. Qasıetti Qadir túni - 17 sáýirden 18 sáýirge qaraǵan tún. Al 21 sáýir - Oraza aıttyń birinshi kúni.