Bas múftı Ramazan aıyna baılanysty úndeý jasady

«Qurmetti baýyrlar, otandastar! Táýelsiz elimiz álem jurtshylyǵyna óziniń yntymaǵy men birligi jarasqan el retinde tanyldy. Az ýaqyt ishinde ǵasyrǵa tatyrlyq jumys atqarylǵanymen áli de óz kezegin kútken sharýalar jeterlik. Bizdiń eń úlken baılyǵymyz - otanymyzdyń tynyshtyǵy men tatýlyǵy. Osyǵan oraı jurtymyzdyń damýyna árbir azamatymyzdyń qosar úlesi zor dep bilemin.

Musylman úshin otyz kún oraza ustaý - ulyq    ǵıbadat. Bul kúnderde oraza ustaýmen qatar muqtaj jandarǵa qaıyrymdylyq jasaý da Alla quzyryndaǵy saýaby mol amalǵa jatady. Isi musylman balasy qasıetti ramazan aıynda saýaptan úmittenip kóptegen ıgi ister jasaýdy ádetke aınaldyrǵan.

Kele jatqan qasıetti Ramazan aıynda múmkindigi bar otandastarymdy Alla razylyǵy úshin ıgi isterdi meılinshe kóbirek jasaýǵa shaqyramyn. Ókinishtisi jyl saıyn Ramazan aıy kelýimen dúkender men bazarlarda azyq-túlik baǵalary kúrt qymbattap shyǵa keledi. Bul, árıne, halyqtyń oryndy renishin týǵyzady. Ramazan biz úshin berekesi mol, Allanyń rahymy men meıirimi jaýatyn aı ekenin umytpaıyq. Bul aıda jasalǵan árbir izgi amal ózge aılarǵa qaraǵanda saýaby eselep artatyny sózsiz. Sondyqtan osynaý múbárak aıda túrli mekeme basshylary men kásipker musylman baýyrlarymdy Jaratýshy Iemizdiń meıirimin tilep, azyq-túliktiń, qonaqúıler men qoǵamdyq qyzmetterdiń, kıim-keshektiń, qurylys zattary men janar-jaǵarmaıdyń, mektep formasy men oqýlyqtarynyń, demalys lagerleri men shıpajaılardyń, meıramhanalar men ashanalardyń baǵasyn 10 paıyzǵa túsirip, jeńildik jasaýǵa shaqyramyn. Qoǵamdyq kólikterde júrý aqysy, kommýnaldyq qyzmet tólemaqylary men telekommýnıkatsııalyq baılanys tarıfteri  de osylaı tómendetilip, jatsa, nur ústine nur. Ótken 2011 jyly  da osyndaı úndeý jarııalaǵanymyzda Bizge qoldaý bildirip, ózderiniń ónimderiniń baǵasyn 10-30 paıyz arasynda tómendetken baýyrlarymyzǵa Alla razy bolsyn»,-delingen onda.

Sonymen qatar Bas múftı Qasıetti aıda Alla taǵalanyń ashýy men qaharyn týdyrýǵa sebepshi araq-sharaptan, dinimiz tyıym salǵan basqa da haram is-áreketterden aýlaq bolýǵa, Ramazan aıynyń qurmetine jáne basqa da aılarda meıramhanalar men jıyn-toılarda ishkiliktiń eshbir túri dastarhanǵa qoıylmaýyna jáne dúkenderde satylmaýyna shaqyrdy.

«Jarylqaýshy aıda saýapty amaldar - halyqqa jaqsylyq jasaýdyń osynaý oraıy kelgen qolaıly sátin múmkindiginshe paıdalanyp qalaıyq, aǵaıyn!»,-deıdi Ábsattar qajy Derbisáli.

2012 jyldyń 20 shildesi - qasıetti Ramazan aıynyń birinshi kúni.