Bas múftı Ramazan aıynda kásipkerlerdi jeńildik jasaýǵa shaqyrdy
ASTANA. KAZINFORM – Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly bıylǵy Ramazan aıynyń bastalýyna qatysty málimdeme jasady.
«Qazaqstan musylmandary dinı basqarmasynyń Sharıǵat jáne pátýa bólimi Túrkııa, Ázerbaıjan, Ózbekstan, Qyrǵyzstan elderiniń Ǵulamalar keńesimen, pátýa salasyna jaýapty ǵalymdarmen aqyldasa kele, bıylǵy Ramazan aıynyń bastalatyn kúnin bekitti. Ortaq pátýaǵa sáıkes, qasıetti Ramazan aıy 11 naýryzda bastalady. Al sáýir aıynyń 5-inen 6-na qaraǵan tún – qasıetti Qadir túni. 10 sáýir – Oraza aıt merekesi», - dedi Naýryzbaı qajy Taǵanuly.
Osy rette Bas múftı halyqty qasıetti aıda júzege asatyn qaıyrymdylyq is-sharalarǵa úles qosýǵa shaqyrdy.
«Kásipkerlerdi áleýmettik mańyzy bar azyq-túlik baǵasyna múmkindiginshe jeńildik jasaýǵa úndeımin. Qoǵamdyq tamaqtaný oryndarynda aýyzashar mázirin halyqqa yńǵaıly baǵamen usyný da saýapty istiń biri. Dúkenderde kúlli jamandyqtyń bastaýy bolǵan araq-sharap satylmasa degen tilegimizdi jetkizemin. Sonymen qatar barsha halyqtyń ortaq ıgiligi úshin salynyp jatqan jol, kópir, mektep, meshit, medrese, balabaqsha, sport kesheni syndy mańyzdy ǵımarattarǵa az da bolsa úles qosyp, belsendilik tanytýǵa shaqyramyz. Osy qasıetti aıda shamasy kelgen kisiler mundaı saýapty ári halyqqa paıda tıetin isterge qolǵabys bolyp, kómek berip, qoldaý bildirse, nur ústine nur bolar edi», - dedi ol.
Naýryzbaı qajy Taǵanuly osy aıda jaǵdaıy bar adamdardy muqtajdarǵa kómektesýge shaqyrdy.
Qazaqstan musylmandary dinı basqarmasynyń Tóralqa májilisinde pitir sadaqasy elimiz boıynsha eki keli unnyń ortasha baǵasy negizinde 640 teńge bolyp bekitildi.
Aıta keteıik, júkti, omyraýda balasy bar áıelderge, jolaýshylarǵa, naýqas jandarǵa oraza ustaý – paryz emes. Saparda júrgenderge oraza ustamaýǵa bolady. Biraq basqa kúnderde sanyn toltyryp, aýyz bekitedi. Eger sapar qıyndyq týǵyzbasa, abzaly – aýyz bekitý.
Oblys, qala, aýdan jáne aýyldyń (barlyǵy 6000 eldi meken) oraza jáne namaz kestesin muftyat.kz saıtynan myna silteme boıynsha júktep alýǵa bolady.
