Bas múftı Orazada azyq-túlik baǵasyn ósirmeýge shaqyrdy
ASTANA. KAZINFORM – QMDB tóraǵasy, Bas múftı Naýryzbaı qajy Taǵanuly Ramazan aıyna baılanysty halyqqa úndeý jasady.
– Ardaqty aǵaıyn, qadirli jamaǵat! Sizderdi ısi musylman balasy asyǵa kútetin, on eki aıdyń sultany bolǵan qasıetti Ramazan aıynyń kelýimen shyn júrekten quttyqtaımyn. Alla Taǵala qasıetti aıda ustaıtyn orazamyzdy, izgi amaldarymyzdy qabyl etip, mol saýaptan jazǵaı.
Oraza – eń aldymen júrektiń amaly. Ramazan – júrekti tazartýǵa, nıetti túzetýge, nápsini tárbıeleýge jáne taqýalyqqa jetýge múmkindik berilgen qasıetti aı. Orazanyń shynaıy rýhyn túsingen adam as pen sýdan tyıylýdy basty maqsat etpeıdi. Aýyz bekitýdegi negizgi maqsat – júrekti Allaǵa jaqyndatyp, oı men júrekti túrli dertten tazalaý, ishki jan dúnıeni kórkem minezben bezendirý, - dedi Bas múftı.
Óz kezeginde QMDB tóraǵasy Ramazan aıyna baılanysty kásipkerlerdi áleýmettik mańyzy bar azyq-túlik taýarlary baǵasyn tómendetýge shaqyrdy.
– San ǵasyrdan beri Islam dinin rýhanı tiregi etken halqymyz berekeli Ramazan aıyn erekshe daıyndyqpen kútedi. Saýaptar eselenip jazylatyn aıda aýyzashar berip, kómekke muqtaj jandarǵa qaıyrymdylyq jasap,úlkenderdiń alǵysy men batasyn alýǵa tyrysady. Allaǵa shúkir, orazada ıgi nıetpen oryndalatyn izgi amaldar búginde salt-dástúrimizge aınalyp, urpaqtan-urpaqqa jalǵasyp keledi. Osy rette barsha otandastarymdy Qazaqstan musylmandary dinı basqarmasynyń qasıetti aıda uıymdastyratyn qaıyrymdylyq is-sharalaryna úles qosýǵa shaqyramyn. Kásipkerlerdi áleýmettik mańyzy bar azyq-túlikterdiń baǵasyna jeńildik jasaýǵa úndeımin. Ramazan aıyna týra kelgen qudaıy astardy aýyzashar ýaqytynda ótkizip, kóbirek saýap alýǵa tyrysaıyq.
Qoǵamdyq tamaqtaný oryndarynda aýyzashar mázirin halyqqa yńǵaıly baǵamen usyný da – saýapty istiń biri. Dúkenderde kúlli jamandyqtyń bastaýy bolǵan araq-sharap satylmasa degen tilegimizdi jetkizemiz. Berekeli, saýaby mol aıda Allanyń meıirimine bólenip, árbir izgi amalymyzdyń jaqsylyǵy eselenip jazylǵaı, - dedi Naýryzbaı qajy Taǵanuly.
Eske sala keteıik, buǵan deıin Qazaqstan musylmandary dinı basqarmasy elimizdiń qalalary men aýyldaryna arnalǵan Ramazan aıynyń oraza kestesin jarııalaǵanyn jazǵanbyz.