Bas múftı: Naýryz - túrki jurtynyń mereıli merekesi
«Ulystyń uly kúni sanalǵan Naýryz - túrki jurtynyń mereıli merekesi. Musylmandyqty bekem ustanǵan qazaq halqy bul kúndi erekshe daıyndyqpen ótkizedi. Aqsaqaldy qarııalar, aq samaıly áje-apalar aq dastarhan jaıyp, qonaq kútip, bata beredi. «Ulys oń bolsyn, aq mol bolsyn!» - degen tilek-duǵalar aıtylatyn Naýryz - birliktiń, yntymaqtyń, bereke men tatýlyqtyń merekesi. Bul kúni arazdasqandar - adamgershilik, renjiskender - raqymdylyq jolyn ustanady. Asylynda musylmandar úshin bireýge renjýge de, ózgeni renjitýge de bolmaıdy. Alaıda osynaý izgilik merekesinde adamdar keshirimdilikke, tatýlyqqa uıysady. Óıtkeni, Alla taǵala qasıetti Quranda «Keshirim jolyn ustan» dep buıyrǵan.
Naýryzdy halqymyz dinı dep emes, ata-babamyzdan jalǵasyn taýyp kele jatqan ulttyq mereke, salt-dástúrimizdiń jalǵasy dep toılaıdy. Imandylyqpen ushtasqan, ult jadynan umytyla bastaǵan ulttyq qundylyqtardy jandandyrýǵa din ókilderi de atsalysýda. Qazaqstan musylmandary dinı basqarmasy 2014 jyldy «Din men dástúr» jyly dep jarııalady. Halqymyzdyń uǵymyndaǵy «kórimdik, erýlik, súıinshi, sybaǵa, bazarlyq, jylý, asar, qol úzdik» syndy asyl sózder musylman qazaqtyń darhan minez, keńpeıil, qonaqjaı, baýyrmaldyǵynyń bultartpas dáleli. Dástúrine bekem urpaq asyl dinimizdegi izgilikke bastaıtyn qundylyqtarǵa qurmetpen qaraıtyn bolady. Mine, ulttyq merekemiz áz Naýryz urpaqty uıymshyldyqqa uıytady, úlken-kishini syılaı bilýge tárbıeleıdi. Alla taǵala yryzdyq-nesibemizdi molaıtyp, birlik-berekemizdi arttyrǵaı. Naýryz merekesi qutty bolsyn! Aq mol bolsyn! Jaratýshy Iemiz el ıgiligi úshin qyzmet etip júrgen, dinimiz ben dilimizdiń janashyry bolǵan Elbasyna, halyq qamyn oılaǵan azamattarǵa kúsh-qýat, yntymaq násip etkeı! Rabbymyz memleketimizdiń táýelsizdigin máńgilik etip, dinimiz ben dástúrimizdi, elimizdiń eńsesin bıiktetsin! Imandy urpaq sabaqtastyǵy jalǵasyn taýyp, uly murattarǵa umtylǵan halqymyzdyń tilegi qabyl, muraty asyl bolǵaı! Áýmın!», - dep qazaq jurtyna batasyn berdi Bas múftı.
