Bas múftı musylman jurtyn Máýlit merekesimen quttyqtady

«Sharapaty mol máýlit merekesi bizdiń halqymyzǵa da qutty bolsyn. Osynaý aıtýly meıramnyń aıasynda Alla Elshisin (s.ǵ.s.) kóbirek tanyp, ósıetterin tereńirek túsinýdi násip etsin. Osy mereke adamdar arasyndaǵy raqym-meıirimniń, ımandylyqtyń, baýyrmaldyqtyń arta túsýine bir sep bolǵaı. Paıǵambardyń (s.ǵ.s.) ámirine moıynsunyp, tyıymynan tyıylýǵa túrtki bolǵaı. Máýlit aıynda Allany madaqtap, paıǵambarǵa (s.ǵ.s.) salaýat aıtyp, ózgelerge jaqsylyq jasaýdyń saýaby teńdessiz. Quran oqyp, Alla Elshisiniń (s.ǵ.s.) ómiri men ónegesi jaıly kitap oqýdyń da musylmanǵa bereri mol. Alla taǵala elimizge, jerimizge bereketin jaýdyryp, halqymyzdyń keń peıili men izgi nıetine saı, birligimizge syzat túsirmeı, jaqsylyǵyn násip etkeı! Táýelsizdigimizdiń tuǵyry bıik, memleketimizdiń mereıi ústem, elimizdiń egemendigi baıandy bolǵaı! Jaratýshy Iemiz barshamyzdy jaqsylyqta, saýapty isterde, el ıgiligi jolyndaǵy jumystarda, berekeli basqosýlarda jolyqtyrǵaı! Eki dúnıede de júzimiz jarqyn, muratymyz asyl, duǵamyz qabyl bolǵaı!», - dep ıgi tilegin bildirdi Bas Múftı.