Bas múftı men Almaty qalasynyń ákimi aǵash otyrǵyzdy (FOTO)
ASTANA. QazAqparat - Búgin Qazaqstan musylmandary dinı basqarmasynyń tóraǵasy Erjan qajy Malǵajyuly Almaty qalasynda ótken aǵash otyrǵyzý is-sharasyna qatysty.
Ol qala ákimi Ahmetjan Esimovpen birge shyrsha egip, mádenıet qaıratkerlerimen, stýdenttermen kezdesti, dep habarlaıdy QMDB baspasóz qyzmeti.
Ahmetjan Smaǵululy buqaralyq aqparat quraldaryna bergen suhbatynda bul ıgi is qala boıynsha júzege asyp jatqanyn aıtty. Qala ákimi túrli sala ókilderimen kezdesip, Bas múftımen de suhbattasty. Erjan qajy Malǵajyuly barshany biriktirgen sharanyń mańyzdy ekenine toqtaldy. «Dinı basqarma jýyrda barlyq meshitterde «Imandylyqqa uıytyp elimizdi, tal egip, kórkeıteıik jerimizdi» atty aktsııa ótkizedi. Qorshaǵan ortany qorǵaý, tabıǵatty aıalaý - adamzatqa ortaq borysh», - dedi Bas múftı.
