Bas múftı Qurban aıtqa baılanysty kásipkerlerge úndeý jasady
ASTANA. KAZINFORM – Búgin Astanada Qurban aıt merekesine baılanysty ótken baspasóz máslıhatynda Bas múftı Naýryzbaı qajy Taǵanuly kásipkerlerge úndeý jasady. Bul týraly Qazaqstan musylmandar dinı basqarmasynyń baspasóz qyzmeti málim etti.
Bas múftı mal qunyn qoldan kótermeı, halyqqa qoljetimdi baǵaǵa satýǵa shaqyrdy.
– Qoja Ahmet ıAsaýı babamyz bir danalyq sózinde Haqqa qyzmet halyqqa qyzmet etýden bastalatynyn aıtqan. Bul – halyqtyń razylyǵy Haqtyń razylyǵynda degen sóz. Osy rette elimizdegi barsha sharýa qojalyǵynyń qojaıyndaryn mal qunyn qoldan kótermeı, halyqqa ońtaıly baǵany usynýǵa shaqyramyn. Árıne, eńbektiń aqtalǵany jaqsy. Degenmen biz «paıda oılama, ar oıla» degen qanatty sózge mán bergen halyqpyz. Alla Taǵala halyqqa jasaǵan jaqsylyqtaryńyzdy ózderińizge eselep beredi. Óıtkeni Jaratýshy Jabbar Iemiz Quranda «Árbir jaqsy nárseden jasaǵan qaıyr-sadaqalaryń (saýaby) ózderińe tolyq qaıtarylady, senderge ádiletsizdik istelmeıdi» dep, musylman balasyn zor qýanyshty habarmen súıinshilegen («Baqara» súresi, 272-aıat). Sonymen qatar barsha kásipkerdi turǵyndar kúnde tutynatyn áleýmettik mańyzy bar azyq-túlik baǵasyna múmkindiginshe jeńildik jasaýǵa úndeımin. Allanyń raqym nury tógiletin Qurban aıtta jurtymyzǵa jaqsylyq jasap, kópshiliktiń alǵysyn alaıyq, aǵaıyn! - dep atap ótti Naýryzbaı qajy Taǵanuly.
Aıta keteıik, Qurban aıt merekesi 6 maýsymda bastalady.
– Bıyl qasıetti Qurban aıt merekesi 6 maýsymda bastalady. Qazaqstan musylmandary dinı basqarmasy birqatar alys ta jaqyn musylman elderdiń ǵulamalarymen, pátýá shyǵarý ortalyqtarymen keńesip, osyndaı pátýá qabyldady, - dedi Bas múftı QMDB-da ótken baspasóz máslıhatynda.
