Bas múftı: Qurban aıt - otbasy qundylyǵyn arttyratyn mereke

Meıirimdi, raqymdy Allanyń atymen bastaımyn!

Qadirmendi musylman baýyrlar, qurmetti otandastar!

Barshamyzdy qýanysh-shattyqqa bóleıtin, qut-berekeli, musylman qaýymynyń ulyq merekesi - Qurban aıtqa aman-esen jetkizgen Alla taǵalaǵa sansyz shúkirler men maqtaýlar bolsyn!

Álemniń ár túkpirin mekendegen musylmandar bul kúni Jaratýshy Iemizdiń razylyǵy úshin qurban shalyp, Allanyń meıirim-shapaǵatyna bólenýge tyrysady. Adam osyndaı izgi amaly arqyly Rabbysyna jaqyndaı túsedi. Al «qurban» sózi «jaqyn bolý», «jaqyndaý» degen maǵynany bildiredi. Bul kúni qajylyqqa attanǵan musylman baýyrlarymyz, otandastarymyz júzderin Qaǵbaǵa qaratyp, Arafat taýynda elimizdiń ıgiligi men halqymyzdyń birligin tilep, eki dúnıeniń baqytyn surap, Jaratqanǵa jalbaryna duǵa jasaıdy.

Táýelsiz elimizdiń tuńǵysh Prezıdenti, asyl dinimizdiń janashyry Nursultan Ábishuly Nazarbaev Qurban aıt meıramyn Qazaqstan jurtshylyǵy úshin demalys kúni dep jarııalady. Bul - ulyq merekeni halyqtyq deńgeıde atap ótýge, kópultty Otanymyzdy meken etken halyqtar dostyǵy men birligin nyǵaıta túsýge septigin tıgizip keledi. Eń bastysy, biz muny dástúrli dinimiz Islamǵa kórsetilgen qurmet dep bilemiz.

Qurban aıtty atap ótýdiń máni men maǵynasy zor. Allany bir, paıǵambardy haq dep bilgen musylmandar meshitterimizde aıt namazyn oqyp, duǵa jasap, bir-birin merekemen quttyqtap, máre-sáre bolǵannan keıin qurbandyq shalady. Qurbandyq eti aǵaıyn-týys, kórshi-qolań, turmysy tómen otbasylaryna, jetim men jesirlerge, múgedekterge taratylady. Osylaısha adamda meıirim, qamqor, keshirim, qaıyr-shapaǵat, sabyr syndy kórkem minez qalyptasady.

Bul - aǵaıyn arasyn jaqyndata túsetin kún. Arazdasqan adamdar tatýlasyp, ózara keshirim jasap, týysqandyq baılanysty kúsheıtýge ıtermeleıtin ulyq meıram. Óıtkeni, Alla taǵala: «Sen keshirim jolyn ustan, jaqsylyqqa buıyr, nadandyqtan bet bur» («Aǵraf» súresi, 199-aıat) dep musylmandardy barynsha keshirimdi bola túsýge shaqyrǵan. Qurban aıt kúni aǵaıyn-týystyrdy, dos-jarandar men kórshilerdi aıtpen quttyqtap, aq dastarqan basynda Allanyń buıyrǵan rızyq-nesibesinen, qurbandyq etinen dám tatqan abzal.

Qurban aıt - otbasy qundylyǵyn arttyratyn mereke. Ata-anaǵa, Qudaı qosqan jarymyzǵa, bala-shaǵamyzǵa arnaıy syılyq berý, jańa kıim áperý - meıramnyń sánin keltirip, mánin arttyrady. Mundaıda óskeleń urpaq Qurban aıttyń qadiri men saýabyn sezinip, izgilikke umtylady, merekeni asyǵa kútedi.

Qurban aıttyń musylman jamaǵatyn, ulystar men ulttardy biriktirýdegi, ózara baýyrmaldyqty arttyrýdaǵy róli orasan zor. Adamdar bir-birine: «Aıt qutty bolsyn!» aıtysyp, aman-saýlyq surasyp jatady.

Bul kúni erte turyp, ǵusyl quıynyp, hosh ıis sebinip, meshitte aıt namazyn oqý - saýapty is. Qurbandyq etinen dám tatý, Allaǵa madaq, paıǵambarǵa (s.ǵ.s.) salaýat aıtý - súnnet amal.

Qazaqstan musylmandary dinı basqarmasy múbárak merekeni joǵary deńgeıde ótkizý úshin birqatar ıgi sharalar men izgi isterdi júzege asyrý uıǵaryldy. Ýaǵyzdarda dinı turaqtylyq pen beıbitshilik, halqymyzdyń birligi men yntymaǵyn nyǵaıtý máselelerine mán berilip keledi.

Qurban shalý aıt namazynan keıin aıttyń úshinshi kúni aqsham namazyna az ýaqyt qalǵanǵa deıin jalǵasady. Eger bul talap oryndalmasa, onda ol sadaqa sanalady. Qoı, eshki, sıyr jáne túıeni qurbandyqqa shalýǵa bolady. Sıyr nemese túıeni jeti kisi birigip, ortaq shalýdy sharıǵatymyz quptaıdy. Paıǵambarymyz (s.ǵ.s.) bir hadısinde: «Soqyrlyǵy anyq belgili soqyr, aýrýy belgili aýrýshań, (júre almaıtyndaı dárejede) aqsaqtyǵy belgili bolǵan aqsaq jáne (jilik maıy joq) óte aryq maldar qurbandyqqa jaramaıdy», - degen.

Qadirmendi aǵaıyn, baýyrlar!

Alla taǵala shynaıy nıetterińizdi, izgi amaldaryńyzdy jáne shalǵan qurbandyqtaryńyzdy qaıyrymen qabyl etkeı! Jaratýshy Iemiz barshamyzǵa eki dúnıeniń baqytyn násip etip, júzimizdi jaryq etkeı! Elimizdiń mereıi ústem, táýelsizdigimiz tuǵyrly ári tynyshtyǵy máńgilik bolǵaı!

Beıbit ómirdi murat tutqan musylman qaýymynyń ulyq merekesi qutty bolsyn, aǵaıyn!