Bas múftı qajylardy ulyq saparǵa shyǵaryp saldy
ASTANA. 7 qazan. QazAqparat - Qajylyqtyń ár mınýty qulshylyqpen ótýi tıis. Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly qajylardy ulyq saparǵa shyǵaryp salý rásiminde osylaı dedi.
«Sizder Allanyń úıine bara jatyrsyzdar. Sapardyń ózine tán qıyndyǵy bolady. Sabyrly bolýǵa tyrysyńyzdar. Bir-birlerińizge taıanysh, súıenish, qamqor bolyńyzdar. Qajylyqtyń árbir mınýtyn qulshylyqpen, Allany eske alýmen, elimizge, Elbasymyzǵa, jerimizge, Otanymyzǵa duǵa-tilek jasaýmen ótkizý abzal», - dedi Bas múftı.
Muftyat.kz saıtynyń jazýynsha, Erjan qajy Malǵajyuly bata jasap, qajylarǵa sát sapar tiledi.
Aıta keteıik, bıyl elimizden 4400 jerlesimiz qajylyqqa attanady. Olarǵa 20 qajylyq kompanııasy qyzmet kórsetedi. Al birinshi naıb múftı Serikbaı qajy Oraz QMDB Qajylyq mıssııasyna tóraǵalyq etedi.
