Bas múftı qazaqstandyqtardy Ramazan aıynyń bastalýymen quttyqtady

«Meıirimdi, raqymdy Allanyń atymen bastaımyn!

Barshamyzdy qasıetti Ramazan aıyna aman-esen jetkizgen Alla taǵalaǵa sansyz shúkirshilik aıtamyz.

Qurmetti musylman baýyrlar!

Iman bulaǵynan sýsyndaı bastaǵan halqymyz múbárák Ramazanda Allanyń raqymyna bólenýdi úmit etip, saýaby mol izgi amaldardy atqarýǵa nıettenip otyr. Sizderdi bir aı boıy jalǵasatyn musylmandardyń ulyq merekesi - Ramazannyń kelýimen quttyqtaımyn!

Alla taǵala óz meıirimi ári keńshiligimen belgili kúnniń, tún men aıdyń qadiri men qasıetin hám artyqshylyǵyn arttyryp qoıdy. Qasıetti Quranda aıtylǵan Ramazan aıynyń ereksheligi sol, bul mezgilde jasalǵan kez kelgen ıgi istiń, Jaratýshyǵa jaqyndatatyn jaqsy amaldyń saýabyn sanaý múmkin emes.

Oraza - Alla men adamnyń arasyndaǵy rııasyz qulshylyq, tek Rabbymyzdyń razylyǵyn kózdeıtin ulyq ǵıbadat. Orazanyń teńdessiz saýabyn Jaratýshy Iemizdiń jasyryp qoıýynda úlken syr bar. Kózben kórip, qolmen ustap, túısikpen túsinip almaıynsha kóp nársege sene bermeıtin adam balasynyń sanasyna salmaq bolatyn saýapty jasyrýda biz bile bermeıtin danalyq kóp. Bul - ulyq ǵıbadatty kirshiksiz oryndap, uly maqsatqa umtylýǵa jeteleıdi. Hadıs-sháripte Alla taǵala: «Aýzy berik adam iship-jeýin men úshin doǵardy. Oraza - Meni men qulymnyń arasyndaǵy ǵıbadat. Oǵan beriletin syıdy Men ǵana ólshep, Men ǵana beremin. Aýzy berik qulymnyń ashtyq pen shólirkegennen shyqqan aýzynyń ısi men úshin mıskten de artyq», - deıdi. Allanyń ýádesi - haq.

Ramazan - rýhanı jańarý aıy. Jerdi meken etken ań men qustyń, barlyq tirshilik ıesiniń jyl mezgilderinde jańarý, túleý, ózgerý úderisinen ótetini belgili. Al Allanyń adam balasyna bergen sheksiz nyǵmeti, teńdessiz syıy sanalǵan oraza - tikendi jerge taban tıgizbeı, saqtanyp júretinimiz sekildi, kúnáǵa betpe-bet kelýden saqtaıtyn, jan-dúnıemizdi, minez-qulqymyzdy jaqsylyqqa tárbıeleıtin, rýhanı túlep shyǵatyn qulshylyq. Aýyz bekitýdiń adam ómirin izgilikke bastaıtynyn bilgen pende odan bas tartýy múmkin emes.

Oraza - sabyr mektebi. Elimiz egemendigin alyp, eńsesin tiktep, rýhanı qundylyqtarymen qaıta qaýyshqan sonaý 1991 jyldary Ramazan aıy kúnniń qysqarǵan, túnniń uzarǵan, ıaǵnı oraza ustaýǵa qolaıly qys mezgiline tuspa-tus keldi. Rasynda da, bul endi ǵana ımanǵa den qoıǵan halqymyzdyń deńgeıine dóp kelgen mezgil edi. Endi, mine, Allaǵa shúkir, keshegi keńes kezinde úzile jazdaǵan rýhanı jibimizdi «Birinshi tilek tileńiz, Bir Allaǵa jazbasqa» dep jyrlaǵan batagóı babalarymyzdyń altyn arqaýyn jalǵaýǵa múmkindik týdy. Jurtymyz Islam qundylyqtarymen qaıta qaýyshyp, rýhanı qazyǵyn qaıta aınalyp tapty. Júrekke bekigen senimge selkeý túspeıdi. Aspan jerge aınalyp túsetin shilińgir shildege tuspa-tus kelgen Ramazanda oraza ustaýǵa kúnniń aptaby nemese basqa da sebepter áser etpeıdi dep senemiz. Sebebi, ımannyń bal dámin tatqan jan Allanyń teńdessiz syıynan shet qalǵysy kelmeıtini haq.

Iman joly sabyrlyq pen taqýalyqty talap etedi. Oraza naǵyz, shynaıy taqýalyqqa jeteleıdi. Quranda Alla taǵala: «Eı, ıman keltirgender! Kúnálardan saqtanyp, taqýalyqqa jetýleriń úshin senderge burynǵylarǵa paryz etilgendeı oraza paryz etildi» («Baqara» súresi, 183-aıat), - deıdi.

Qymbatty otandastar!

Qasıetti Ramazan aıy qutty bolsyn! Ustaǵan orazalaryńyz, duǵa-tilekterińiz qabyl bolǵaı! Ramazan aıynda jasaǵan ıgi isterińiz saýaptan jazylyp, Alla taǵala elimizge, jerimizge bereke jaýdyrǵaı!» delingen bas múftıdiń quttyqtaýynda. Quttyqtaý sózi www.muftyat.kz QMDB-nyń resmı saıtynda jarııalanǵan.