Bas mýftı qazaqstandyqtardy Oraza aıt merekesimen quttyqtady
ASTANA. KAZINFORM – Qazaqstan musylmandary dinı basqarmasynyń tóraǵasy, Bas mýftı Naýryzbaı qajy Taǵanuly qazaqstandyqtarǵa jyly lebizin bildirip, el tynyshtyǵyn tilek etti.
«Sizderdi ısi musylmannyń ulyq meıramy – oraza aıttyń kelýimen shyn júrekten quttyqtaımyn! Aıt qabyl bolsyn! Qasıetti Ramazannyń aıaqtalǵanyn bildiretin meıramda, júrekke meıirim, qýanysh sezimi uıalaıtyn sáýleli sátte sizderge, otbasylaryńyzǵa rııasyz nıetpen Allanyń amandyǵy men berekesin tileımin. Jaratqan jar bolsyn! Alla Taǵala otyz kún boıy ustaǵan orazamyzdy, jasaǵan duǵamyzdy, oryndy sebeptermen aýyz bekite almaı qalǵan jandardyń qaıyrly amaldaryn qabyl etkeı!», - dedi bas mýftı.
«Aıt» sózi – merekeleý, hal surasý, bir-birin qýantý, qýanyshqa toptalý, qarymta degen maǵynany bildiredi.
«Jaratýshy Jabbar Iemiz: «...Olar Men úshin oraza ustady, Meniń pármenimmen aýyz ashty, endi qýanyshqa kenelsin...», - dep súıinshi habar jetkizgen. Jaratýshy Iemiz barsha musylman qaýymnyń qýanyshyn arttyrǵaı! Qazaqstan musylmandary dinı basqarmasy qasıetti Ramazan aıynda elimiz boıynsha qaıyrymdylyq jobalardy júzege asyrdy. Saýaptar eselenip jazylatyn berekeli aıda ıgi iske atsalysqan eriktilerge, demeýshi azamattar men jomart jandarǵa rııasyz nıetpen aıryqsha alǵysymdy bildiremin. Alla razy bolsyn!», - dedi ol.
Oraza aıt – otbasylyq mereke. Meıram kúni syılyq berip, qýanyshqa bóleý – saýapty is. Kómekke muqtaj adamǵa qaıyrymdylyq jasaý da saýaby mol amaldyń biri.
«Ózderińizge belgili, elimizdiń birneshe aımaǵynda bolyp jatqan kóktemgi sý tasqyny jergilikti aǵaıyn-jurtty úreılendirip, úlken ábigerge salýda. Úıi men mal-dúnıesinen aıyrylǵan otbasylarǵa memleketimiz tıisti kómek kórsetýde. Qazaqstan musylmandary dinı basqarmasy da óz múmkindigi aıasynda sý tasqynynan zardap shekken azamattardy meshit pen medreselerge ornalastyryp, olarǵa moraldyq turǵydan qoldaý kórsetti. Sonymen qatar sý basqan aımaqtarǵa 100 tonnadan astam gýmanıtarlyq kómek jiberdi. Tasqyn sýdan úıi jaramsyz bolyp qalǵan qolynda múgedektigi bar eki balasymen sharasyz kúıge túsken jalǵyz basty anaǵa páter berdi. 1113 din qyzmetkeri ortaq iske jumyldyryldy.
Osy rette barsha musylman qaýymyn Oraza aıt kúnderi synaqty kúnderdi bastan keship jatqan jurtymyzǵa qol ushyn berip, júrekterine qýanysh uıalatýǵa shaqyramyn. «Qaıyrymdylyq jasasań – qaıyryn óziń kóresiń» dep halqymyz aıtqandaı, izgi istiń saýaby eselenip, qaıyryn ózderińiz kórińizder.
Oraza aıt merekesi qutty bolsyn! Rabbymyz duǵa-tilegimizdi, qasıetti aıda jasaǵan qaıyrly isterimizdi, bergen zeket pen pitir sadaqamyzdy qabyl etkeı! Ár otbasyna amandyq, jaqsylyq, qut-bereke tileımin. Orazadan orazaǵa deıin aman-esen jete bereıik! Alla Taǵala qazaq dalasyn túrli tabıǵı apattardan saqtaǵaı. Synaqty sátterdi bastan keship jatqan jerlesterimizge Jaratqan Iemiz jar bolǵaı. Elimiz aman, jurtymyz tynysh bolǵaı! Ámın!», - dedi Naýryzbaı qajy Taǵanuly.
