Bas múftı Qazaqstandaǵy pravoslav shirkeýiniń basshysymen kezdesti
ASTANA. 9 sáýir. QazAqparat - Qazaqstan musylmandary dinı basqarmasynyń tóraǵasy Erjan qajy Malǵajyuly elimizdegi orys pravoslav shirkeýiniń Qazaqstan jáne Astanalyq mıtropolıti Aleksandrdy qabyldady. Din ókilderi halyqty izgilikke, adamgershilikke shaqyryp, eldiń birligin nyǵaıtý jolynda birlese jumys isteý qajettigin sóz etti, dep habarlady muftyat.kz QMDB-nyń resmı saıtynan.
«Din ókilderi jaqsylyqqa úles qosýda birqatar berekeli isterdiń bastamashysyna aınalýy tıis. Óıtkeni, másele bárimizge ortaq. Búginde ımannan alshaqtaýdyń aqyry qandaı ókinishti jaǵdaılarǵa ákelip jatqanyn kórip otyrmyz. Temeki shegý, esirtkige elitý, araq ishý, ajyrasý, ózin ólimge qııý, túsik jasatý, t.b. máseleler barshamyzdy oılandyrýy kerek. Eldiń bolashaǵyna bárimiz jaýaptymyz», - dedi Erjan qajy Malǵajyuly.
Bas múftı Islam ózge din ókilderine qurmet kórsetýge úndeıtin kemel din ekenin jetkizdi. Óıtkeni, Islam musylmandardy bireýge tilimen de, qolymen de zarar tıgizbeýge shaqyrady.
Mıtropolıt Aleksandr Bas múftıdiń jańa qyzmetine sáttilik tilep, birlese jumys jasaýǵa senim bildirdi.
muftyat.kz saıtynyń habarlaýynsha, Erjan qajy Malǵajyuly qonaqqa «Assalamýǵaleıkým!» dep sálem bergende, mıtropolıt: «Ýaǵaleıkým assalam» dep, musylmansha jaýap qaıyrypty. Ózara túsinistik, dinı tatýlyq osydan bastalmaq...
