Bas múftı Qazaqstan musylmandaryn Ramazan aıynyń bastalýymen quttyqtady

«20 shildeden bastap   musylman qaýymy oraza ustaıtyn bolady. Bizdiń baýyrlarymyz, apa-qaryndastarymyz, ata-analarymyz, Qazaqstandaǵy musylman sanalatyn 26 ult pen halyq ókilderi oraza tutpaq. Barlyq musylmandardy osy merekemen quttyqtaımyn», - dedi Ábsattar qajy Derbisáli. Sondaı-aq ol bıyl orazanyń 30 kúnge -18 tamyzǵa deıin jalǵasatynyn aıtty. 19 tamyzda musylmandardyń Aıt merekesi bastalady.

Eske sala ketsek, Ramazan aıy kezinde oraza tutqandarǵa kúndiz sý ishýge, tamaq jeýge, temeki tartýǵa jáne nápsige berilýge tyıym salynady. «Keshkisin kún batqan soń árkim úırenshikti qalypqa kóshe alady. Eger adam osy oraza tutqan ýaqytta aýyryp qalsa, oraza tutylmaǵan kúnderin jazylǵannan keıin ótese bolady», - dedi múftı.

Bıyl Almatydaǵy qaıyrymdylyq sadaqasynyń mólsheri adam basyna 100 teńge dep belgilendi. «Ádette sadaqa mólsheri 2 keli bıdaıdyń baǵasymen ólshenedi. Biraq biz aýqatty memleketpiz. Sondyqtan bıylǵy sadaqa mólsherin adam basyna 100 teńge dep belgiledik», - dep túsindirdi Ábsattar qajy Derbisáli. Bul týraly QazTAG habarlady.