Bas múftı Qazaqstan halqyna Úndeý joldady
ASTANA. 2 shilde. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly hazret Ramazan aıyna baılanysty el halqyna Úndeý joldady. Osyǵan oraı, QazAqparat agenttigi atalmysh Úndeýdiń mátinin taratady.
«Meıirimdi, raqymdy Allanyń atymen bastaımyn! Qurmetti baýyrlar! Musylman qaýymynyń ulyq merekesi – qasıetti Ramazan aıy múbárák bolǵaı! Orazaǵa aman-esen jetkizgen Alla taǵalaǵa sansyz shúkirler men madaqtar bolsyn! Alla taǵalanyń teńdessiz syıy – Otanymyzdyń táýelsizdigin baıandy ete túsý úshin kózi ashyq, kókiregi oıaý, el qamyn oılaıtyn árbir azamatqa artylar senim men talap zor. Bul qadam ártúrli saladaǵy tapsyrylǵan isti atqarýǵa tıis barsha qazaqstandyqtarǵa úlken jaýapkershilik júkteıdi. Memlekettiń mereıin ústem etý jolynda álemdik tájirıbeniń eń ozyǵy men eń jańashylyn tańdap alý úshin eldiń árbir azamatynan bilimdilik pen biliktilik talap etiledi.
Eldi ilgeri súıreıtin ilkimdi isterdiń irgetasy izgilikke, ımandylyqqa, ádildikke, adamgershilikke qurylmasa, Allany tanyp, Uly Jaratýshy aldyndaǵy jaýapkershilikpen ushtaspasa, eldik maqsat tolyq oryndalmaıtynyn barshamyz baıqap-baǵamdadyq. Qyzymyz salıqaly, ulymyz ulyqty bolmaı, uly muratqa jete almaıtynymyzdy sezindik. Bilimdi de bilikti degen azamattyń nápsisine tusaý sala almaýy, kelesheginen úmit kútken bozbala men boıjetkenniń ıman men ıbalyqtan alshaqtaýy, ózin-ózi óltirý, araqqumarlyq, jemqorlyq, zınaqorlyq, nashaqorlyq t.b. syndy derttiń dendep ketýine negizgi sebeptiń biri – rýhanı daǵdarys ekenine kózimiz jetti. Danyshpan Abaı aıtqan «jaqsy men jamandy aıyrmaý, ynsap, uıat, ıman, ar, namys, sabyr, talap» etpeý adamdy tejeýsiz nápsiniń qulyna aınaldyrmaq. Biz buryn-sońdy estip, kórmegen buzaqy is-áreketter buqaralyq aqparat quraldarynda jıi kórsetilip, jarııalanýda. Munyń bári Jaratýshy Iemizdiń sharıǵatyn saqtamaǵandyq ekeni aıtpasaq ta túsinikti.
Qymbatty otandastar! Biz búginde táýelsiz elimizdiń jarqyn bolashaǵy úshin qyzmet etetin bilimdi, ımandy, ıbaly, Otanyn súıetin urpaq tárbıeleý jaýapkershiligi júktelgen zamanda ómir súrip otyrmyz. Iman bulaǵynan sýsyndaǵan adam aryna daq túsirmeıdi. Óıtkeni, Islam adamgershilik qundylyqtardy qasterleýge úndeıdi. Dástúrli dinderdiń maqsaty – izgilik pen adamgershilik. Osy oraıda barshańyzdy qasıetti Ramazan aıyn ıgi istermen, Jaratýshyǵa jaqyndatatyn qaıyrymdylyqtarmen, muqtaj jandarǵa kómektesýmen, jetim men jesirge, qarttar men múgedekterge meıirim tanytyp, ózara túsinistikpen ótkizýge shaqyramyn. Alla taǵala qasıetti Quranda: «Jaqsylyqta, taqýalyqta bir-birińe kómektesińder», – dep buıyrǵan («Máıda» súresi, 2-aıat).
Ramazan – tárbıe aıy, jasaǵan jaqsylyqtardyń saýaby eselenip jazylatyn, Jaratýshy Iemizdiń jarylqaýyna, raqymyna bólenetin aı. Olaı bolsa, Allanyń teńdessiz syıyna izgi de, qaıyrymdy is-áreketterimizben qol jetkizýge aıanyp qalmaıyq! Imandylyǵymyzdy kúsheıte túseıik!
Qasıetti aıdyń qurmetine toılarda, keshterde araq-sharap ishilmese, artyq ysyrapshyldyqqa jol berilmese, azyq-túlik baǵalary tómendetilse, halyqqa qyzmet etýdiń barlyq túrlerine jeńildikter jasalsa, muqtaj jandarǵa kóńil bólinse, Alla razylyǵy úshin beriletin as-taǵamdar aýyzasharlar kezinde berilse degen izgi nıetimiz oryndalsa nur ústine nur bolar edi.
Osy Úndeý erekshe meıirimdi, qudireti kúshti Alla taǵalanyń razylyǵy men raqymyna, berekesi men shapaǵatyna elimiz bólene bersin degen asyl arman, uly murattan týǵan izgi maqsat edi. Jarylqaýshy aıda jasaǵan izgi nıet pen amaldaryńyz basqa da aılarda jalǵasa bergeı! Alla taǵala barshamyzdyń eki dúnıede de júzimizdi jaryq etkeı! Elimiz aman, jurtymyz tynysh bolǵaı! Ámın!».
