Bas múftı kásipkerlerdi Qurban aıt qarsańynda mal baǵasyn kótermeýge shaqyrdy
ASTANA. KAZINFORM — Bıyl merekeniń birinshi kúni 27 mamyrǵa saı kelip otyr. Bul jóninde Qazaqstan musylmandary dinı basqarmasynda ótken baspasóz konferentsııasynda QMDB tóraǵasy, Bas múftı Naýryzbaı qajy Taǵanuly málimdedi.
Onyń sózinshe, Qurban aıtta qaıyrymdylyq, adamgershilik tárizdi qundylyqtar kórinis tabýy kerek.
— Baǵzy zamannan beri Islam dinin rýhanı tiregine aınaldyrǵan halqymyz Qurban aıtty aıryqsha daıyndyqpen qarsy alǵan. Maldyń eń úlkenin ári jaqsysyn qurbandyqqa shalyp, qurbandyq etin kómekke muqtaj jandarǵa taratý, qonaq kútip, úlkenniń batasyn alý, syılyq-káde berý, renjitken jandy keshirý, otbasyn qýanyshqa keneltý syndy amaldar — dástúrimizde qalyptasqan izgi qundylyqtar, — dedi Naýryzbaı qajy Taǵanuly.
Sonymen birge, ol Qurban aıt qarsańynda mal baǵasyn qymbattatpaýǵa shaqyrdy.
— Qurban aıt tek dinı mereke ǵana emes, qoǵamdaǵy birlik pen tatýlyqty nyǵaıtatyn, qaıyrymdylyqty pash etetin rýhanı meıram. Osy oraıda elimizdegi barsha kásipker azamatty Qurban aıtta mal qunyn qoldan kótermeı, halyqtyń áleýmettik jaǵdaıyn eskerip, ońtaıly baǵa usynýǵa, jurtymyz kúnde tutynatyn azyq-túlikke múmkindiginshe jeńildik jasaýǵa úndeımin, — dedi Bas múftı.
Aıta keteıik, buǵan deıin qurban shalý rásimin qashyqtan ótkizýge arnalǵan saıt iske qosylǵanyn jazǵanbyz.
