Bas múftı kásipkerlerdi azyq-túlik baǵasyna jeńildik jasaýǵa shaqyrdy
ASTANA. KAZINFORM – Qoǵamdyq tamaqtaný oryndarynda aýyzashar mázirin halyqqa yńǵaıly baǵamen usyný kerek. Bul týraly elordada ótken baspasóz máslıhatynda Bas múftı Naýryzbaı qajy Taǵanuly málim etti.
- Qazaqstan musylmandary dinı basqarmasynyń Sharıǵat jáne pátýa bólimi Túrkııa, Ázerbaıjan, Ózbekstan, Qyrǵyzstan elderiniń Ǵulamalar keńesimen, pátýa salasyna jaýapty ǵalymdarmen aqyldasa kele, bıylǵy Ramazan aıynyń bastalatyn kúnin bekitti. Ortaq pátýaǵa sáıkes, Alla qalasa bıylǵy qasıetti Ramazan aıy 1 naýryzda bastalady. Naýryz aıynyń 26-ynan 27-ine qaraǵan tún – qasıetti Qadir túni. 30 naýryz – Oraza aıt merekesi. Bıyl Ramazan orazasy 29 kúnge kelip otyr. Alla Taǵala qasıetti Quranda: «Ýa, ıman keltirgender! Ózderińe deıingi qaýymdarǵa paryz etilgendeı taqýalyqqa jetýleriń úshin senderge de oraza ustaý paryz etildi» («Baqara» súresi, 183-aıat) dep ámir etken. Sharıǵatymyz boıynsha balıǵatqa tolǵan, aqyl-esi durys árbir musylmanǵa Ramazan aıynda oraza ustaý – paryz, - dedi Naýryzbaı qajy Taǵanuly.
Sonymen qatar ol jolaýshylar, naýqas jandar men syrqaty asqynyp ketýinen qaýiptengen adamdar, sondaı-aq júkti nemese emizýli balasy bar áıelder oraza ustaýdy keıingi ýaqytqa qaldyrýyna bolatynyn eske saldy. Buǵan sharıǵatymyz ruqsat beredi. Islam dini aýyz bekitýge, zeket pen sadaqa berýge shamasy kelmeıtin adamdardy aýyrtpalyqtan bosatqan.
- Densaýlyǵyna baılanysty nemese kárilik jetip oraza ustaýǵa shamasy jetpegen adamdar aýyz bekitken kisilerge aýyzashar berse, ol da – úlken saýap... Osy rette barshańyzdy Qazaqstan musylmandary dinı basqarmasynyń qasıetti aıda uıymdastyratyn qaıyrymdylyq is-sharalaryna úles qosýǵa shaqyramyn. Kásipkerlerdi áleýmettik mańyzy bar azyq-túlikterdiń baǵasyna jeńildik jasaýǵa úndeımin. Ramazan aıyna týra kelgen qudaıy astardy aýyzashar ýaqytynda ótkizip, kóbirek saýap alýǵa tyrysaıyq. Qoǵamdyq tamaqtaný oryndarynda aýyzashar mázirin halyqqa yńǵaıly baǵamen usyný da – saýapty istiń biri. Bul aıda tek tabysqa kenelýge emes, eń bastysy Haqtyń razylyǵy men halyqtyń alǵysyn alýǵa asyqqan abzal. Dúkenderde kúlli jamandyqtyń bastaýy bolǵan araq-sharap satylmasa degen tilegimizdi jetkizemiz, - dedi Bas múftı.
Qazaqstan musylmandary dinı basqarmasy ortaq pátýaǵa sáıkes, qasıetti Ramazan aıy 1 naýryzda bastalatynyn habarlap otyr. Naýryz aıynyń 26-nan 27-ne qaraǵan tún — Qadir túni, al 30 naýryz — Oraza aıt merekesi.
Elimizdiń Bas múftıi Naýryzbaı qajy Taǵanulynyń tóraǵalyǵymen ótken Qazaqstan musylmandary dinı basqarmasynyń tóralqa májilisinde pitir sadaqasy elimiz boıynsha eki keli unnyń ortasha baǵasy negizinde 655 teńge bolyp bekitildi.
Aıta keteıik, barlyq óńir, qala, aýdan jáne aýyldyń (barlyǵy 6000 eldi meken) oraza jáne namaz kestesin PDF formatta muftyat.kz saıtynan siltemege ótip júktep alýǵa bolady.