Bas múftı qasıetti Ramazan aıy qarsańynda halyqqa úndeý joldady

Meıirimdi, rahymdy Allanyń atymen bastalǵan úndeýde: «Qurmetti musylmandar, otandastar! Bıyl - súıikti Otanymyz úshin erekshe jyl. El táýelsizdiginiń 20 jyldyǵy. Dál osy aıtýly kezeńde egemen elimiz Islam Yntymaqtastyq uıymynyń tizginin qolǵa alyp, qazaqtyń baıtaq dalasynyń shejire - tarıhy Islammen bite qaınasyp jatqandyǵyn dúıim jurtqa pash etýde.

Táýelsizdigimizdi alǵaly bergi az ǵana merzim ishinde elimiz aıaǵynan tik turyp, qarqyndy damý jolyna tústi. Alla taǵalanyń meıirim-rahymy túsip, Qazaqstan jurty mereıli 20 jyldyǵyn álem aldynda abyroımen, tolaǵaı tabys jáne bereke-birlik, yntymaqpen qarsy alyp otyr. Nebári jıyrma jylda ǵasyrǵa tatyrlyq orasan zor ister atqaryldy. Halyqaralyq mártebeli uıymdarǵa tóraǵalyq etti. Munyń qaı-qaısysy da elim, jerim, halqym degen árbir otandasymyzdyń maqtanysh sezimi men qýanyshyn tasytary sózsiz. Bul tabystarda keńpeıil de jomart halqymyzdyń beıbitshiliksúıgish darhandyǵynyń úlesi mol dep bilemin. Alla taǵaladan elimizdiń odan ári bıik belesterge kóterile berýin tileımin.

Múmkindigi bar otandastarymdy osynaý qasıetti de, berekege toly aıda Alla razylyǵy úshin ıgi isterdi meılinshe kóbirek jasaýǵa shaqyramyn. Jyl saıyn Ramazan aıy kelýimen dúkender men bazarlarda azyq-túlik baǵalarynyń kúrt qymbattap ketetinin kórip júrmiz. Bul, árıne, halyqtyń oryndy narazylyǵyn týǵyzady. Múbárak aıda kásipker musylman baýyrlarymdy Jasaǵan ıemizdiń meıirimin tilep, azyq-túliktiń, qonaqúıler men qoǵamdyq qyzmetterdiń baǵasyn 10 paıyzǵa jeńildetýge shaqyramyn. Qoǵamdyq kólikterde júrý aqysy, kommýnaldyq tólemaqylar jáne telekommýnıkatsııalyq baılanys tarıfteri de osylaı tómendetilse.

Jurtymyz qasıetti aıda Alla taǵalanyń ashýy men qaharyn týdyrýǵa sebepshi araq-sharaptan, sharıǵatymyz tyıym salǵan basqa da haram is-áreketterden aýlaq bolsa degen tilegim bar. Meıramhanalar men jıyn-toılarda ishkiliktiń eshbir túri ishilmese, dúkenderde satylmasa. Sebebi, ardaqty Muhammed (s.ǵ.s.) paıǵambarymyzdyń qudsı hadısinde Alla taǵala ishimdik ishkendi, ishkizgendi, satqandy, satyp alǵandy, sondaı-aq ony jasap shyǵarǵandy laǵynettegen.

Qasıetti Quran kárimde: «Áı, ıman keltirgender! Araq ishý, qumar oınaý, buttarǵa tabyný jáne bal ashatyn oqtar - lastyq, shaıtannyń isteri. Muratqa jetem deseńder olardan aýlaq bolyńdar», - delingen («Maıda» súresi, 90-91 aıat).

Bul úndeý barsha adamzat balasyna mol rızyq berýshi Alla taǵalanyń razylyǵyna bizdiń jurtymyz munan ári qaraı da bólenip, saýabyna ıe bola berse degen izgi maqsattan týyp otyr. Saýapty amaldar jasaýdyń sátin qoldan shyǵaryp almaıyq, aǵaıyn!», - delingen.