Bas múftı qarttarǵa aýyzashar dastarhanyn jaıdy
ASTANA. 22 shilde. QazAqparat - Qasıetti Ramazanda jasalǵan árbir izgi de ıgilikti istiń saýaby men qaıyrymy mol. Qulshylyq aıynda qarttarǵa kóńil bólýdiń de mańyzy zor.
Keshe Qazaqstan musylmandary dinı basqarmasynyń tóraǵasy Erjan qajy Malǵajyuly hazret Almatydaǵy Ardagerler úıinde aýyzashar dastarhanyn jaıyp, 100-ge jýyq qamkóńil qarııalarǵa ýaǵyz aıtyp, kitap syılady. Bul týraly QMDB baspasóz qyzmetinen habarlandy.
«Alla taǵala adam balasyn ártúrli jaǵdaılarmen synaıdy. Qarttyq, aýrý, baılyq, kedeıshilik, jetim-jesirlik, t.b. Munyń bári - biz úshin synaq. Eger osyǵan sabyr etip, Allaǵa shúkir aıtyp, synaqtan súrinbeı óter bolsaq, Jaratýshy Iemizdiń syı-qurmetine, nyǵmetine, jarylqaýyna, meıirim-shapaǵatyna bólenemiz. Alla taǵala ustaǵan orazalaryńyzdy qabyl etip, barshamyzdy eki dúnıeniń baqytyna bólegeı. Jaratýshy Iemiz jerimizge bereketin jaýdyryp, jastarymyzǵa ıman, qarttarymyzǵa kúsh-jiger, qulshylyǵymyzǵa yqylas násip etkeı! El qamynda júrgen Elbasymyzǵa amandyq, elimizge tynyshtyq bergeı», - dep duǵa jasady Bas múftı Erjan qajy Malǵajyuly.
Ardagerler úıinde bes ýaqyt namazyn oqyp, Alladan medet tilep, bataly sóz aıtyp júrgen qazynaly qarttar da az emes eken. Qartaıdym-aý demeı, qulshylyǵyna bekem bop, aýyz bekitip júrgen qarttarǵa qurmet kórsetildi. Bas múftı Ahmet Kádirov pen Jaısanbaı Qańtarbaev aqsaqalǵa kishi qajylyqqa tegin joldamany syıǵa tartty. Ózge ulttyń ardagerleri de Bas múftıdiń bul bastamasyn jaqsylyqqa balap, izgi nıetterin jaýdyryp jatty.
Batagóı aqsaqaldar, qazynaly qarttar aýyzashar dastarhanynan keıin Bas múftıge qaıyrymdylyq is-sharalar úshin aq batasyn berip, shyǵaryp saldy.
