Bas múftı qart ájeıge Qajylyqqa joldama berdi

ASTANA. QazAqparat - Keshe Astana qalasynda turatyn Kádimqyzy Orynbasar apamyz úshin aq túıeniń qaryny jarylǵan kún boldy. Qala shetindegi jaldap turyp jatqan qýyqtaı bólmesine QMDB-nyń tóraǵasy, Bas múftı Erjan qajy Malǵajyuly keledi dep keıýana múldem oılamasa kerek, dep jazady muslim.kz.

Ara-tura hal-jaǵdaıyn surap, kómektesip ketip turatyn «Áziret Sultan» meshitiniń qyzmetkerlerimen birge jańbyrly kúni úıine kirip kelgen dinbasyn kórgeninde, tipten, abdyrap qaldy. Kózinde jalt ete qalǵan qýanysh ushqynymen birge, tańdanys taby da joq emes.

Alaıda, qýanyshtyń kókesi áli alda edi. Qart ájeıge qurmetin kórsetip, qonaq bolyp kelip qalǵan Bas múftıdiń qarııaǵa arnaǵan tosynsyıy taǵy bar eken. Aldymyzda kele jatqan 1-qazan «Qarttar kúnine» oraı Kádimqyzy Orynbasar apamyzdy merekemen quttyqtap ótken Bas múftı «Qajylyq sertıfıkatyn» tabystaǵan sátte apamyz shydamastan eki kózine erik berdi.

Osydan birneshe aı buryn otandyq telearnalardyń birinde baǵdarlama qonaǵy bolǵan apamyz óziniń asyl armany - qajylyq sapary jaıly aıtyp, turmys taýqymeti turalatqan myna zamanda sol armanym oryndalmaı ketetin shyǵar dep kúrsingen edi. Oılamaǵan jerden oljaly bolyp, kóńili sharyqtaǵan qart ájeı kelgen qonaqtarǵa aq tilegin jaýdyryp, kóńilderin bosatty.

Budan bólek, Orynbasar apamyzǵa «Áziret Sultan» meshiti atynan 100 000 teńge kóleminde qarjylaı kómek pen azyq-túlik qory tartý etildi.

Esterińizde bolsa, qasıetti Qurban aıt merekesinde «Áziret Sultan» meshitiniń áıel ustazdary bastaǵan aqjaýlyqty jamaǵaty «Qaıyrymdylyq jármeńkesin» uıymdastyryp, túsken qarjy túgeldeı meıirimge muqtaj jandarǵa jumsalatyny týraly aıtylǵan edi. Jármeńkeden túsken qarjynyń qomaqty bóligi birer apta buryn qalamyzdaǵy «Balalar úıine» berilgen bolatyn. Sol «Qaıyrymdylyq jármeńkesinen» jınalǵan qarjynyń búgin Orynbasar apamyzdyń da bir jyrtyǵyn bútindeýge septigi tıetini qandaı keremet deseńizshi!