Bas múftı: Qadir keshi - saýaptar eselenip jazylatyn erekshe, qasıetti tún
ASTANA. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly qazaqstandyqtardy qasıetti Qadir túnimen quttyqtady.
***
Qurmetti baýyrlar, qadirli jamaǵat!
Qadir túnine barshamyzdy aman-esen jetkizgen Alla Taǵalaǵa sheksiz shúkirler men madaqtar bolsyn!
«Qadir» sózi arab tilinen aýdarǵanda «qasıetti tún» degen maǵynany bildiredi. Bul - Quran túsken tún. Alla Taǵala «Qadir» súresinde: «Rasynda Biz Qurandy qadir túni túsirdik. Qadir keshi myń aıdan qaıyrly», - dep baıandaǵan.
Túnderdiń tóresi, myń aıdan qaıyrly, perishteler jerge túsip, jer betinde bereke ornaıtyn Qadir keshi - saýaptar eselenip jazylatyn erekshe, qasıetti tún.
Jaratýshy Iemiz bul túni shynaıy namaz oqyp, Ózine jalbaryna duǵa jasaǵan pendeniń barlyq qaıyrly amaldaryn qabyl etedi. Ótken qate-kemshilikteri men kúnálary úshin ókinip, Jaratqannan keshirilýin tilegen adamnyń tilegi de qabyl bolmaq. Sondyqtan osy keshte kóbirek duǵa jasaǵan abzal.
Aısha anamyz (Alla oǵan razy bolsyn) paıǵambarymyz Muhammedten (Allanyń oǵan salaýaty men sálemi bolsyn): «Ýa, Allanyń elshisi! Eger Qadir túnine jetsem, qandaı duǵa jasaıyn?» - dep suraıdy. Sonda eki dúnıe sárýary: «Ýa, Alla! Sen tym keshirimdisiń, keshirýdi jaqsy kóresiń, meni de keshire gór!», - dep duǵa jasaýdy ósıet etken.
Paıǵambarymyz taǵy bir hadısinde: «Alla Taǵala Qadir túnin meniń úmmetime syılyq etip bergen. Mundaı nyǵmet burynǵy úmmetke buıyrmaǵan », - dep Siz ben bizge súıinshi habar aıtyp, shattyqqa bólegen.
Alla Taǵala barshamyzdyń duǵa-tilekterimizdi, árbir qaıyrly amaldarymyzdy Qadir túniniń qurmeti úshin qabyl etkeı! Elimiz aman, jurtymyz tynysh bolǵaı! Birligimiz ben berekemiz artyp, Jaratýshy Iemiz árqashan halqymyzǵa jar bolǵaı! Ámın!
