Bas múftı ımamdarǵa tıisti tapsyrmalar berdi
ASTANA. 5 maýsym. QazAqparat - Qazaqstan musylmandary dinı basqarmasynyń tóraǵasy Erjan qajy Malǵajyuly Almaty qalasyndaǵy meshitterdi aralap, ımamdardyń jumysyn pysyqtap, tıisti tapsyrmalar berýde. Búgin Bas múftı «Orbıta» meshitinde jamaǵatpen júzdesti.
«Jasy bar, jasamysy bar, qulshylyq úıinde Quran úırenip, Islam qundylyqtaryn boıyna sińirip, ilimge den qoıǵan 164 shákirt Erjan qajy Malǵajyulynyń qolynan sertıfıkat aldy. 38 adam meshittegi tigin sheberhanasynda dáris tyńdap, sheberlerden tájirıbe alǵan»,-dep habarlady QMDB baspasóz qyzmeti.
«Meshit - bilim men ǵylymnyń, tárbıe men izgiliktiń ordasy. Alla úıinde jasalǵan qulshylyqtyń, alǵan bilimniń saýaby mol. Paıǵambardyń (s.ǵ.s.) mırasqorlary - ilim izdeýshiler. Alla taǵala qasıetti Quranda Jaratýshy Ieden bilimdarlar, ǵalymdar kóbirek qorqatynyn baıandaǵan. Alla taǵala dinı bilim alǵan adamnyń jánnatqa barar jolyn jeńildetip qoıady. Al hadıste adamdardyń jaqsysy - Quran úırenip, ony ózgege úıretken pendeler ekeni aıtylǵan. Alǵan ilimderińizdi Alla saýaptan jazǵaı!» - dedi Erjan qajy Malǵajyuly shákirtterge sertıfıkatty tabystaý saltanatynda.
«Orbıta» meshitiniń bas ımamy Asan Tileýberdıev Bas múftıge meshittiń oqý-aǵartý, ýaǵyz-nasıhat, Ramazanǵa daıyndyq jumystary jaıly baıandap berdi.
