Bas múftı halyqty Ramazan aıynda barynsha qaıyrymdy bolýǵa shaqyrdy
«Biz Ortalyq Azııa elderiniń múftılerimen, ondaǵy pátýa salasyna jaýapty ǵalymdarmen aqyldasa kele jáne ǵylymı zertteýler nátıjesin eskerip, ortaq sheshim qabyldadyq. Alla qalasa, bıyl ramazan aıy 23 naýryzda bastalady. Al sáýir aıynyń 17-nen 18-ne qaraǵan tún – qasıetti Qadir túni. 21 sáýir – oraza aıt merekesi. Bıylǵy pitir sadaqasy jan basyna 535 teńge bolyp bekitildi. Pitir sadaqasy mólsheri elimiz boıynsha eki keli unnyń ortaq baǵasy negizinde belgilendi. Pitir sadaqasyn qurma, meıiz baǵasymen berýge bolady», - dedi Bas múftı ortalyq kommýnıkatsııalar qyzmetinde ótken brıfıngide.
Sondaı-aq Naýryzbaı qajy Taǵanuly sharıǵat boıynsha balıǵatqa tolǵan, aqyl-esi durys árbir musylmanǵa Ramazan aıynda oraza ustaý – paryz ekenin eske saldy. Alaıda, jolaýshylarǵa, syrqattanǵan nemese densaýlyǵy jaramaıtyn adamdar dertiniń asqynýynan qaýiptense oraza tutýdy keıinge qaldyrýǵa sharıǵatymyz ruqsat beredi. Sondaı-aq júkti nemese omyraýda balasy bar áıelderge de ýaqytsha oraza ustamaýǵa bolady.
Onyń aıtýyna qaraǵanda, Ramazan aıynda múmkindiginshe muqtaj jandarǵa kómektesip, olardyń alǵysy men batasyn alýǵa asyqqan abzal. «Zeket jáne qaıyrymdylyq» qory qasıetti Ramazan aıynda birneshe qaıyrymdylyq jobalar ótkizbekshi. Atap aıtqanda, «Sharapatty Ramazan», «Ramazan qorjyny», «Ramazannan táberik» syndy aýqymdy respýblıkalyq qaıyrymdylyq is-sharalardy uıymdastyrady.
«Barsha halyqty saýapty isterimizge úles qosyp, jaqsylyqtyń basy-qasynan tabylyp, belsendi túrde atsalysýǵa shaqyramyn. Osy rette kásipker azamattardy, saýda ortalyqtarynyń basshylaryn qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa úndeımin. Jaqsy amaldaryńyz ózderińizge eselep jaqsylyq bolyp qaıtatynynda kúmán joq», - dedi Bas múftı.
