Bas múftı halyq batyry T. Bıgeldınovqa shapan jaýyp, qasıetti Quran kitabyn syıǵa tartty
Júzdesýde Talǵat Jaqypbekuly Erjan qajy Maıamerovti jańa qyzmetimen quttyqtap, jyly lebizi men tilegin bildirdi. Aq batasyn berdi. 91 jasty alqymdaǵan ushqysh-batyr surapyl soǵys jyldarynda jasaǵan erligin eske túsirip, 180 ushaqty qulatyp, dushpannyń kózin qalaı joıǵany jaıly Bas múftıge áńgimelep berdi.
«Talǵat aǵa, Alla sizge qýat bersin. Siz zulmat zamanda kókiregin oqqa tirep, ult úshin erlik jasaǵan biregeı batyrsyz. Halqyńyz mundaı eren eńbegińiz ben erligińizdi eshqashan umytpaıdy. Qazaqstan musylmandary atynan Sizdi mereıli merekeńizben quttyqtaımyn. Alla taǵala el tynyshtyǵy jolynda jasaǵan jaqsylyqtaryńyzdy saýaptan jazsyn. Sizge eliktep ósken óskeleń urpaq Siz sekildi ult úshin aıanbaı qyzmet etetin bolady», - dep izgi nıetin bildirdi Erjan qajy Malǵajyuly.
Talǵat Bıgeldınov - TMD boıynsha biregeı general-maıor. «Meniń ájem 101 jyl ómir súrdi. Bala kezimde maǵan bir duǵa úıretti. Ony árdaıym ushaqta aıtatynmyn. Qazir de aýzymnan tastamaımyn. Osy duǵany aıtqannan keıin jigerlenip ketemin. Soǵystan aman qalýyma ájem úıretken duǵanyń áseri boldy dep oılaımyn», - dedi Talǵat Bıgeldınov Bas múftımen jyly júzdesýde.
«Paıǵambarymyz Muhammedtiń (s.ǵ.s.) óz úmbetine sapar aldynda aıtýdy ósıet etken duǵany batyr Talǵat áli kúnge deıin umytpapty. Ony Dinı basqarmadan kelgen qonaqtarǵa arab tilinde múdirmeı jatqa aıtyp berdi. Qazaq batyrymen bir saǵatqa sozylǵan salıqaly syr-suhbatta Bas múftı halyqqa qaltqysyz qyzmet etýden asqan baqyt joq ekeni jaıly áńgime órbitti. Kishipeıildik tanytyp, úıine arnaıy barǵan Bas múftı Erjan qajy Malǵajyulyna batyr Talǵat aqsaqal alǵysyn jaýdyryp, izgi nıetin jetkizdi. Jumysyna sáttilik tilep, «Alla razy bolsyn» aıtyp, shyǵaryp saldy»,- delingen baspasóz habarlamasynda.
