Bas múftı Erjan qajy Malǵajyuly musylmandardy Oraza aıt merekesimen quttyqtady
ASTANA. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly 17 shildede kiretin Oraza aıt merekesimen quttyqtady. Qazaqstan Bas múftıiniń quttyqtaýyn oqyrman nazaryna usynamyz.
ORAZA AIT MÚBÁRAK BOLSYN, BAÝYRLAR!
Qurmetti baýyrlar! Oraza aıt merekesine aman-esen jetkizgen Alla Taǵalaǵa sansyz shúkirler men madaqtar bolsyn. Barsha halyqty musylman qaýymynyń ulyq, qasterli merekesi Oraza aıt meıramynyń bastalýymen quttyqtaımyn. Aıt múbárak bolsyn, aǵaıyn! Qasıetti Ramazan aıynyń aıaqtalǵanyn bildiretin Oraza aıt meıirimdiliktiń, ıgiliktiń, birliktiń, izettiliktiń, qaıyrymdylyqtyń merekesi. Bul meıram barsha halyqty izgilikke uıytady. Keńpeıil, baýyrmal, qonaqjaı, darhan minezdi musylman halqymyz Oraza aıtty erekshe atap ótken. Bıyl elimizdiń musylmandary da qasıetti Ramazanda aýyz bekitip, sharapaty mol aıda jasalǵan izgi is-sharalarymyzǵa atsalysty. Meshitterimizde aýyzasharlar men qaıyrymdylyq aktsııalar ótti. Turmys jaǵdaıy tómen otbasylaryna kómek kórsetildi. Saýaby teńdessiz osynaý jaqsy isterge úles qosqan otandastaryma «Alla razy bolsyn» aıtamyn. «Aıt» sózi «qarymta» degen maǵynany bildiredi. Jaratýshy Iemiz árbir izgi amal men ıgilikti istiń saýabyn berip, meıirim-shapaǵatyn tógedi. Oraza aıt bir aı boıy oraza ustap, yqylaspen jaqsylyq jasaǵan adamnyń qurmetke, marapatqa ıe bolatyn kezi. Alla barshamyzdy mol saýapqa kenelgen quldarynyń qataryna qosýyn tileımin. Aıt kúninde tolyq jýynyp, jupar ıis sebinip, jamaǵatpen aıt namazyna qatysýdyń saýaby erekshe. Aıt namazyna barýdan aldyn qurmadan dám tatý paıǵambarymyz Muhammedtiń (Allanyń oǵan salaýaty men sálemi bolsyn) súnnet amaly. Aǵaıyn-týysty, kórshiler men ózge ult ókilderin ortaq merekemen quttyqtap, jyly shyraı tanytyp, tileýlestik bildirý de ıgi amal.
Qadirli aǵaıyn! Barsha otandastarymdy Oraza aıttyń qurmeti úshin bir-birimizdi keshirip, ózara tatýlyǵymyzdy nyǵaıtyp, áýeli Allanyń, ata-anamyzdyń qurmeti men rızalyǵyna bólenýge shaqyramyn. Alla Taǵala ustaǵan orazalarymyzdy, duǵa-tilekterimizdi qabyl etkeı! Halqymyzdyń birligi men yntymaǵy artyp, Táýelsizdigimizdiń tuǵyry bıik, Elbasy bastaǵan egemen elimizdiń bolashaǵy baıandy bolǵaı!
Oraza aıt qutty bolsyn!
Erjan qajy MALǴAJYULY,
Qazaqstan musylmandary dinı basqarmasynyń tóraǵasy, Bas múftı
