Bas múftı dinaralyq qatynastardyń jańa kókjıekterin ashýǵa úndedi
Onyń aıtýynsha, ıslam dini - irgetasyn qalaǵan kúnnen beri, dinaralyq túsinistiktiń qajettiligin ýaǵyzdap keledi.
«Súıikti Paıǵambarymyz (s.a.s) Mekkeden Medınaǵa hıjrat etkennen keıin de eshbir pendeni ıslam dinin qabyldaýǵa májbúrlegen emes. Qaıta ózge din ókilderimen jaqsy mámilede bolýdy nasıhattaǵan. Ol bir hadısinde: «Eger kórshiń ózge din ókilderinen bolsa, onda seniń moınyńda bir aqysy bar» degen bolatyn», - dedi Bas múftı.
«Qoǵamda senimen birge ómir súrip jatqan barlyq azamattardyń ár nársege óz quqyǵy bar. Ol qandaı dinde bolsyn, onymen jaqsy mámilede bolýymyz kerek. Súıikti Paıǵambarymyz (s.a.s) ózge dindegilerdiń quqyǵyn qorǵaý jáne olarmen jaqsy mámilede bolý musylmanshylyqtyń mindeti ekendigin birqatar hadısterinde aıtyp ketken. Din - búkil álemde adamdardyń rýhanı dúnıetanymyn baıytyp otyr. Jer betindegi adamzat qaýymynyń ómir súrý ıgiligine óz úlesin qosatyn qýatty kúsh. Sondyqtan sol kúshti adamdar arasyndaǵy dostyq pen yntymaqtastyqqa jáne memleketimizdiń damýyna jumsaýymyz qajet», - dep atap kórsetti bas múftı.
