Bas múftı: «Bolmaıdy» deýge bolmaıdy...
ASTANA. 19 qyrkúıek. QazAqparat - Búgin Bas múftı Erjan qajy Malǵajyuly jańa oqý jylynyń bastalýyna oraı Almatydaǵy Ábý Hanıfa medresesiniń shákirtterimen kezdesti. Bul týraly QMDB baspasóz qyzmetinen habarlandy.
Bolashaq ımamdarmen júzdesýde elimizdegi dinı ahýal sóz boldy. Bas múftı oqý ordasynyń tálimgerlerine dinniń keıbir názik tustary men pikirtalas týdyryp otyrǵan jaıttaryn jan-jaqty túsindirip, dáris júrgizdi. Erjan qajy Malǵajyuly dinniń senim, quqyq salalary boıynsha shákirtterdiń suraqtaryna jaýap berdi.
«Sizder - bolashaq ımamsyzdar. Erteń halyq ózderin tolǵandyrǵan suraqtardy qoıa bastaǵan kezde sizder naqty ári saýatty jaýap berýlerińiz qajet. Dinı aǵymdarmen kúres júrgizý jumystarynda da bilimmen qarýlaný asa mańyzdy. Din ókili kez kelgen másele jaıly pikir aıtqanda, birden kesip aıtýyna bolmaıdy. «Munyńyz durys emes, bolmaıdy» dep dúrse qoıa berýge de áste bolmaıdy. Ár nárseni baıyppen, baısaldylyqpen, danalyqpen, jan-jaqty túsindire otyryp, sanasyna jetkizýimiz lázim. Ol úshin ilimdi yqylaspen alýymyz qajet. Sabaqtan basqa dúnıelik isterge kóńil bólmegen durys. Eger paıdasyz, qajetsiz nársege alańdaıtyn bolsaq, onda basqa bilim qonbaıdy. Búgingideı múmkindikti paıdalanyp, ustazdardan kóbirek ilim úırenýge den qoıyńyzdar», - dedi Bas múftı Erjan qajy Malǵajyuly.
Elimizdegi iri medreselerdiń biri - Ábý Hanıfaǵa bıyl 30 shákirt oqýǵa qabyldandy.
