Bas múftı: Birligi bekem eldiń berekesi artady
ASTANA. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly barsha qazaqstandyqtardy Qazaqstan halqynyń birligi kúni merekesimen quttyqtady. «QazAqparat» HAA quttyqtaý mátinin jarııalaıdy.
Asa qamqor, erekshe meıirimdi Allanyń atymen bastaımyn!
Halqymyz kóktemniń mamyrajaı mamyr aıynyń birinshi kúninde birlik merekesin atap ótedi. Mereıli meıramdaǵy izgi is-sharalar elimizdi ıgilikke, halqymyzdy birlikke bastap keledi.
«Birlik» - qasıetti sóz. Qasıetti kitabymyz Quranda birlik týraly baıandalǵan. Sońǵy paıǵambarymyz Muhammed (Allanyń oǵan ıgiligi men sálemi bolsyn) hadısterinde de adamzattyń aýyzbirshiligin ýaǵyzdaǵan. Jaratýshy Iemiz «Álı Imran» súresinde: «...Bólinbeńder», - dep ámir etse, Onyń Elshisi (Allanyń oǵan ıgiligi men sálemi bolsyn): «...Kópshilikpen birge bolyńdar! Bólinýden saqtanyńdar», - dep, jamaǵatty, barsha adam balasyn meıirimdilikke, ortaq maqsatqa úndegen.
Halqymyzdyń bı-sheshenderi men aqyn-jyraýlary da árqashan ósıetti sózderi men ǵıbratty tolǵamdarynda, óleń-jyrlarynda birlikti nasıhattaǵan. Maıqy bı babamyzdyń:
«Altaý ala bolsa, aýyzdaǵy ketedi,
Tórteý túgel bolsa, tóbedegi keledi», - degen naqyl sózi qansha ǵasyr ótse de urpaqqa ónege bola bermek. Tóle bıdiń: «Birlik bolmaı, tirlik bolmas», - deýi de tegin emes. Osynaý parasatty paıymdaýlar halqymyzdyń sanasynda saqtalyp, dosqa qamqor, ózgege ónege kórsetip, birlikti tý etip keledi. Keshegi kóregen bılerimizdiń asyl amanaty - búgin Elbasymyzben berekeli bastamalarǵa, beıbitshilikke, ortaq kelisimge baǵyttalýda. Osynyń arqasynda búgingi kúni elimizdi mekendegen 100-den astam ulttar men ulystar, ártúrli din ókilderi Qazaqstanda tatý-tátti ómir súrýde.
Allanyń bergen ólsheýsiz nyǵmeti ári syıy - Táýelsizdigimizdi baıandy ete túsý úshin eń aldymen birligimizge bekem bolýymyz kerek.
Qadirli baýyrlar! 1 mamyr birlik merekesi qutty bolsyn! Alla Taǵala halqymyzdyń birligi men berekesin arttyryp, bolashaqqa basqan qadamymyzdy berekeli etsin! Tilegimiz qabyl, muratymyz asyl bolǵaı! Ámın!
