Bas múftı balalar qalashyǵyna baryp, balǵyndardy Qurban aıtpen quttyqtady
Qamkóńil balalardyń ortaq qazanyna qurbandyqqa shalynǵan mal etteri berilip, jetimder úıine járdem kórsetildi.
Arnaıy túrde at basyn tiregen bas múftı qalashyqtyń tynys-tirshiligimen tanysyp, tárbıeshi analarmen júzdesti. Qurban aıt kúni kelgen qutty qonaqty tárbıeshi analar úılerine shaqyryp, dastarhannan dám tatýdy usyndy. Syıly qonaqty syrtynan estip-bilgenderi bolmasa, kózimen kórmegen balǵyndarǵa bul kezdesýdiń orny aıryqsha bolǵany anyq. Dastarhan basynda birge otyryp tamaqtanǵan sáttegi tolqynystan barlyǵynyń da júzderi bal-bul janyp, júzderinde qýanyshty kúlki paıda boldy. Tárbıeshi analar da bul júzdesýdiń búldirshinder ómirine eleýli ózgeris engizip, júrekterine ımandylyq nuryn uıalatatynyna senimdi.
Jetpiske jýyq jetim balalardyń basyn qosyp, januıa jylýlyǵyna bólep otyrǵan bul qalashyq 14 otbasydan turady. Árbir januıada 4-7 balalar ortaqtasyp kún keship, birin-biri aǵa-baýyryndaı ardaqtap, týmasa da týǵandaı bolyp ketken. Tárbıeshiler de jalǵyzbasty analar bolǵandyqtan, ózderiniń januıasy dep osy otbasyn baǵalaıdy. Bas múftı bas suqqan úıdiń anasynyń aıtýynsha, sonaý 2000 jyldan beri jumys istegen ýaqytynda eki ulyn úılendirip, bir qyzyn qutty ornyna qondyrǵan kórinedi. Tipti, uzatý toıyn da osy jerde jasap, qudalaryn da osy jerden kútip alǵan eken.
Balalar qalashyǵynan attanar tusta, Bas múftı Erjan qajy Malǵajyulyna júrekjardy alǵystaryn jaýdyrǵan ardaqty analar ózderiniń tilek kitapshasyna lebiz qaldyrýyn ótindi. Sondaı-aq, búldirshindermen birge estelik sýretke túsirip alýdy da umytpady. «Jetim kórseń, jebeı júr» degen halyq danalyǵyn Qurban aıt meıramynda qaıta jańǵyrtqan Bas múftıge balǵyndar da, analar da alǵystaryn jaýdyryp, rızashylyqtaryn bildirdi.