Bas múftı bala Jambyldy qabyldady
ASTANA. 7 qańtar. QazAqparat - El arasynda bala Jambyl atanyp ketken qazaqtyń qarshadaı uly, 9 jasar daryndy jas aqyn Jambyl Dúısenuly Dinbasy qabyldaýynda boldy, dep habarlaıdy Qazaqstan musylmandary dinı basqarmasynyń baspasóz qyzmetinen.
Bas múftı, sheıh Ábsattar qajy Derbisáli hazret talant ıesimen suhbattasty. Ónerimen alash jurtyn tańqaldyrǵan bala Jambyl Dinbasymen dıdarlasyp, izgilik jaıly áńgimelesti. Bas múftı ımandylyq jolynda júrýdiń mańyzdylyǵyn tilge tıek etip, Islam - adamgershilik pen izgilik dini ekenin jetkizdi.
Jambyl Dúısenuly Dinbasyna «Perishte tilek» atty kitabyn tartý etti.
Jamaǵattyń jadynda bolar, ardaqty Muhammed Paıǵambarymyzdyń (s.ǵ.s.) Máýlit keshinde jas aqyn Jambyl Dúısenuly óz qalamynan týǵan «Adamzattyń abzaly», «Ar-namys jaıly» óleńin tebirenispen oqyp, kópshilikke kóz tastaǵan edi. Bas múftı máýlit saltanatynyń joǵary deńgeıde ótýine eleýli úles qosyp, jıylǵan jurtty boıyna bitken dara ónerimen tánti etken bala Jambylǵa alǵysyn bildirip, batasyn berdi jáne alǵys hatpen marapattady. «Óneriń órge júzsin, qanatyń talmasyn, el-jurtyńnyń úmitin aqtaı ber! Alla Taǵala ózińe baqytty da, berekeli ǵumyr násip etsin!» dedi Dinbasy.
