Bas múftı Astana kúnimen quttyqtady

Bas múftı: "Qudaıǵa shúkir, elimiz turaqty damý ústinde. Saıyn dalany mekendegen san alýan ult pen ulystyń ókili tatý-tátti ǵumyr keship keledi. Osynyń bári halqymyzǵa bergen Allanyń syıy, ólsheýsiz raqymy. Halqymyz Táýelsizdikti toılap, ony máńgilik etýdi oılap júrgen joraly jurt ekenin álem moıyndady. Endeshe, Elbasy aıtqandaı, barshamyz Táýelsizdigimizdi sát saıyn qorǵaýymyz qajet. Beıbit zamandy basty baılyǵy sanaǵan súıikti Otanymyz álemge bitimger, araǵaıyn, ymyrashyl irgeli el retinde tanyldy. Din qaıratkerleriniń basyn qosyp, barsha halyqty dinı tatýlyq pen turaqtylyqqa úndegen eńseli Elordamyz - Astana rýhanı kelisimniń ordasy ekenin elimizdiń árbir azamaty maqtanyshpen aıtady. Bir shańyraq astynda, bir atanyń balasyndaı, tatý ómir súrip kele jatqan 100-den astam ult ókilderi Qazaqstannyń qaryshtap damýyna úlken úles qosýda. Dostyq pen yntymaqtyń ortalyǵy sanalǵan Astana ultaralyq qarym-qatynas baǵytynda kósh bastap keledi" dep sóz sabaqtaǵan Bas múftı eldi merekemen quttyqtaı otyryp, aq tilegin bylaı jetkizedi: "Alla taǵala Ramazan aıynda jasaǵan duǵalarymyz ben qulshylyqtarymyzdy qabyl etkeı! Elimiz aman, jurtymyz tynysh bolǵaı! Imanymyz kámil, birligimiz bekem bolǵaı!" Osy oraıda Bizdiń ujym da elimizdiń tuǵyry bıik, irgesi berik bolýyna tilektestik bildirip, barsha halyqtyń júregi nurǵa, jany shýaqqa, ómirleri berekege toly bolsyn aıtady. Ámanda Alla qazaq jurtyn nazarynan tastamaǵaı...