Bas múftı Ábsattar Derbisáliniń otbasyna kóńil aıtty
«Búgin tańerteń Qazaqstan musylmandary dinı basqarmasyn 10 jyldan astam ýaqyt basqarǵan, din qaıratkeri, akademık, kórnekti ǵalym Ábsattar qajy Derbisáliniń qaıtys bolǵany týraly qaraly habar jetti. Marqumnyń otbasyna, týǵan-týystaryna, barsha musylman qaýymyna taǵy da kóńil aıtamyn. Alla aldynan jarylqasyn. Imany salamat bolǵaı. Ámın!», - dedi Bas múftı Ortalyq kommýnıkatsııalar qyzmetinde ótken baspasóz máslıhatynda.
Tanymal ǵalymnyń qaıtys bolǵanyn búgin Aqparat jáne qoǵamdyq damý mınıstri Aıda Balaeva áleýmettik jelidegi paraqshasynda jazdy.
«Belgili dintanýshy, shyǵystanýshy, ıslamtanýshy ǵalym Ábsattar qajy Derbisáliniń ómirden ozýyna baılanysty marqumnyń otbasy men jaqyn-týǵandarynyń qaıǵylaryna ortaqtasyp kóńil aıtamyn. Bul búkil qazaq rýhanııatyna ortaq aýyr qaıǵy. Ábsattar Baǵysbaıuly búkil sanaly ǵumyryn ımandylyqqa arnap, asyl dinimizdiń týra jolyn halyqqa durys jetkizý isine ólsheýsiz eńbek sińirdi. Elimizdiń Bas múftıi laýazymynda júrgen ýaqytta qajy aǵamyzben qyzmet barysynda jolyǵysyp turdyq. Qaı kezde de óziniń keń minezimen, tereń bilimimen, parasatty bolmysymen rýhanııat bıiginen kórinip, elimizdegi ultaralyq kelisim men dinaralyq tatýlyqtyń órken jaıýyna ólsheýsiz úles qosqan jan edi. Ábsattar qajy aǵamyzdyń zııaly bolmysy, eline sińirgen eńbegi, jazǵan rýhanı shyǵarmalary, jamaǵatty ıman jolyna shaqyrýda aıtqan aqyl sózderi – eshqashan tozbas rýhanı qazyna bolyp halqynyń jadynda máńgilik saqtalady. Marqumnyń jatqan jeri jaryq, topyraǵy torqa bolyp, nury peıishte shalqysyn» dep jazdy mınıstr Instagram paraqshasynda.
QR Tuńǵysh Prezıdenti – Elbasy Nursultan Nazarbaev ta Ábsattar Derbisáliniń qaıtys bolýyna baılanysty marqumnyń otbasy men týǵan-týystaryna kóńil aıtý jedelhatyn joldady.
Qazaqstannyń Tuńǵysh Prezıdenti Ábsattar qajy Baǵysbaıuly sanaly ǵumyryn ǵylym jolyna, dinı aǵartý salasyna arnaǵan parasaty bıik, paıymy joǵary, aqjarqyn azamat bolǵanyn atap ótti. Jedelhatta kórnekti dintanýshynyń Qazaqstan musylmandary dinı basqarmasynyń basshysy qyzmetin atqarǵan kezde múftııat jumysyn jańa deńgeıge kóterýge, elimizde dinaralyq tatýlyq pen ultaralyq kelisimniń nyǵaıýyna zor úles qosqany aıtylǵan.
Ábsattar Baǵysbaıuly 1947 jyly 15 qyrkúıekte qazirgi Túrkistan oblysy Túlkibas aýdanynda týǵan. Ol – respýblıkamyzdaǵy jas arabtaný ǵylymynyń negizin salýshylardyń biri. Arabıstıka salasy boıynsha elimizdiń tuńǵysh ǵylym doktory, tuńǵysh professory, tuńǵysh akademıgi. Qoja Ahmet ıAsaýı kesenesi men ondaǵy qulyptastardaǵy jazýlardy ana tilimizge aýdaryp, zerttedi. 2003 jáne 2006 jyldary qyrkúıekte Astanada álemdik jáne dástúrli ulttyq din lıderleriniń sezderin ótkizýge úles qosty.
