Bas múftı: 60 jastan asqandar, aýyz bekitpes buryn medıtsınalyq tekserýden ótińizder
«Ramazanda aýyz bekitken ısi musylman balasy ózin iship-jeýden ǵana shektemeı, jany men tánin jamandyqtan saqtap, izgilikke umtylady. Іs-áreketin musylmanǵa tán ádep aıasynda oryndaýǵa tyrysady. Óıtkeni, Ramazan – kez kelgen izgi amaldy rııasyz nıetpen jasaýǵa tárbıeleıtin, adamdy taqýalyqqa úıretetin aı. Ashtyq pen shólge tózip, Alla razylyǵyn alýdy shynaıy nıet etken adamǵa beriletin syı men qurmet erekshe bolmaq.
Alla Taǵala Qudsı-hadıste: «Aýzy berik adam iship-jeýin Men úshin doǵardy. Oraza – Men jáne qulymnyń arasyndaǵy ǵıbadat. Oǵan beriletin syıdy Men ǵana ólshep, Men beremin. Aýzy berik qulymnyń ashtyq pen shóldeý sebebinen shyqqan aýyz ıisi Men úshin mısk átirinen de qaıyrly», – degen. Búginde Qazaqstan musylmandary dinı basqarmasy halqymyzǵa «Ihsan ilimin» keńinen nasıhattap keledi. Ihsan – pendeniń ımanyn bekemdep, qulshylyqqa degen qulshynysyn arttyratyn, adamgershilikke tán ıgi qasıetterdi kemeldendire túsetin rýhanı ilim. Bul – ár amaldy kórkem túrde oryndaýǵa úıretetin ilim», - dedi Bas múftı Ortalyq kommýnıkatsııalar qyzmetindegi brıfıng barysynda.
Osy rette Naýryzbaı qajy Taǵanuly rýhanı kemeldený aıy – Ramazanda barynsha ádepsiz áreket pen qate-kemshilikten arylyp, tula boıymyzda kórkem minez qundylyqtaryn qalyptastyrýǵa tyrysqanymyz abzal ekenin basa aıtty.
«Ókinishke qaraı, bıyl da qasıetti Ramazan aıyn pandemııa jaǵdaıynda ótkizgeli otyrmyz. Juqpaly dertti oqshaýlaný, saqtaný arqyly ǵana jeńýge bolatynyn anyq ańǵardyq. Osy rette sizderdi aýyzashar kezinde, qulshylyq sátterinde sanıtarlyq talaptardy qatań saqtaýǵa shaqyramyn. Densaýlyq – bárinen qymbat qundylyq, Allanyń adamzatqa bergen amanaty. Osy oraıda jasy 60-tan asqan aǵa-apalarymdy aýyz bekitýden buryn medıtsınalyq tekserýden ótip, dárigerdiń tıisti keńesin alýǵa shaqyramyn. Egde jastaǵy jáne balıǵatqa tolmaǵan azamattardan kúrdeli ahýal turaqtalǵansha meshitke barmaı, qulshylyqty úıde oryndaýyn suraımyz», - dedi Qazaqstan musylmandary dinı basqarmasynyń tóraǵasy.
