Tanymal áýe kompanııasy balalarǵa arnalǵan 50% jeńildikti oryndamaǵan
Bas kólik prokýratýrasy janyndaǵy Úılestirý keńesinde avıatsııalyq qaýipsizdik jáne avıajolaýshylardyń quqyqtaryn qorǵaý máseleleri qaraldy, dep habarlaıdy QazAqparat atalǵan vedomstvonyń baspasóz qyzmetine silteme jasap.
Otyrysqa qatysýshylardyń baıandamalaryn talqylaý nátıjeleri boıynsha birqatar sheshimder qabyldanǵan, olar birinshi kezekte memlekettik organdardyń ózara is-qımyl protsesterin tsıfrlandyrýǵa, sondaı-aq obektıvti baqylaý júıelerin jaqsartýǵa baǵyttalǵan.
Osyny oryndaý sheńberinde «Memlekettik jer kadastrynyń» avtomattandyrylǵan aqparattyq júıesine áýeaılaq mańyndaǵy jerdi berýdi shekteıtin qosymsha fýnktsıonaldy engizý jumysy bastalatyn bolady.
Sondaı-aq keńes músheleri QR-kod arqyly avıakompanııalardyń jáne avıatasymaldar salasynda qyzmet kórsetetin basqa da sýbektilerdiń áreketterine nemese áreketsizdigine jolaýshylardyń elektrondyq shaǵym berý týraly usynystardy ázirleýdi qoldaǵan.
Endi Qazaqstannyń avıatsııalyq ákimshiliginiń derekqoryn Densaýlyq saqtaý mınıstrliginiń biryńǵaı aqparattyq júıesimen biriktirý arqyly ushý ekıpajynyń densaýlyq jaǵdaıy týraly qajetti málimetterdi onlaın rejımde anyqtaýǵa bolady.
Ózekti máselelerdiń qatarynda myna jaı atalyp ótti: Qazaqstan Respýblıkasy "Kólik týraly" zańynyń 13-babynda 2-den 12 jasqa deıingi kámeletke tolmaǵan jolaýshylardy halyqaralyq reıstermen, 2-den 15 jasqa deıingi kámeletke tolmaǵan jolaýshylardy ishki reıstermen tasymaldaǵanda 50% jeńildik jasalatyny jazylǵan, alaıda ol oryndalmaǵan.
Mysaly, eń iri avıakompanııalardyń biri saıtta bıletterdi satý kezinde tek 11 jasqa deıingi jolaýshylarǵa ǵana balalar tarıfin qoldanady, al zań boıynsha 15 jasqa deıin balalar tarıfi qoldanylýy kerektigi jazylǵan.
Agregatorlar (bıletterdi onlaın satyp alýǵa arnalǵan qosymshalar) arqyly bıletterdi satyp alǵanda «jeńildik» múldem qoldanylmaıdy.
Buǵan deıin prokýratýranyń aktisi boıynsha «Flaı Arystan» jáne «KazahEır» avıakompanııalary halyqaralyq reısterge «balalarǵa jeńildikterdi» usynbaǵany úshin ákimshilik jaýapkershilikke tartylǵan bolatyn.
Azamattyq avıatsııa komıteti kámeletke tolmaǵan jolaýshylarǵa jeńildikterdiń tıisinshe qoldanylýyn, sondaı-aq jolaýshylardy avıatasymaldaý salasynda sapaly qyzmet kórsetpegeni týraly habardar etýge mindetteıtin zańnamalyq túzetýlerdi júıeli negizde qadaǵalaýǵa múmkindik beretin algorıtm ázirleýmen aınalysady.
Sonymen birge, Tutynýshylardyń quqyqtaryn qorǵaý komıteti múddeli organdarmen birlesip, avıakompanııalarmen reısterdi keshiktirgeni úshin sotqa aıyppuldardy óndirip alý (ár saǵat úshin bılet qunynyń 3%), sondaı-aq «balalardyń bıletter» úshin artyq tólengen somany qaıtarý máselesi boıynsha talap qoıýdy zerdeleıdi.
Sonymen qatar, Ákimshilik quqyq buzýshylyq týraly Kodekske birqatar túzetýler engizý týraly máseleni pysyqtaý josparlanýda, olar jolaýshylardy kidirister týraly ýaqtyly habardar etpeý, balalarǵa, múmkindigi shekteýli adamdarǵa jeńildiktermen qyzmetti kórsetpeý, sondaı-aq «overbýkıng» úshin bólek quqyq buzýshylyqtardyń quramyn qarastyrýda.
Kórsetilgen tapsyrmalar boıynsha naqty merzimder aıqyndaldy jáne olardyń júzege asyrylýyn baqylaý Úılestirý keńesiniń Hatshylyǵyna júkteldi.
