Bas kólik prokýratýrasy Air Astana men Fly Arystan qyzmetin tekserýdi talap etti

ASTANA. KAZINFORM — FlyArystan kompanııasynyń burynǵy qyzmetkeri Renat Abýlhanov Air Astana top-menedjerleriniń múddesine áýe bıletterin jeńildikpen satqanyn málimdedi. 

Esterińizge salsaq, Renat Abýlhanov FlyArystan kompanııasynyń Baǵdar jelilerin josparlaý jáne kiristerdi basqarý departamentiniń dırektory qyzmetin atqarǵan.

Oǵan áýe kompanııasynyń qarajatyn talan-tarajǵa saldy degen aıyp taǵylyp, tergeýge alynǵan.

Kúni keshe Abýlhanovtyń dosy Bekzat Qulmanov Renattyń atynan úndeý hat jarııalady. Hatta onyń kompanııa basshylarynyń tapsyrmasymen áýe bıletterin jeńildikpen rásimdegeni aıtylady. 

— Bul ótinimder maǵan kompanııalardyń top-menedjerlerinen keldi. Onda olar ózderi, týǵan-týystary men túrli «qajetti» adamdar úshin ótinish jasady. Sotta kýáger Air Astana Aq prezıdentiniń jubaıyna, onyń ápkesi men anasyna arzan tarıfpen bıletter jazyp bergenin naqty aıtty. Air Astana AQ bas býhgalteri de sotta kompanııa top-menedjerleriniń mundaı ótinishpen maǵan júginetinin, ózi de júgingenin moıyndady, — delingen hatta.

Osy oraıda Air Astana úkim shyqpaıynsha sot prtsesiniń materıaldaryna pikir bildire almaıtyndyqtaryn málimdedi. Al Bas kólik prokýratýrasy áleýmettik jelide taraǵan aqparattan habardar bolyp shyqty.

— Jarııalanymda áýe kompanııasy basshylyǵynyń nusqaýymen top-mpenedjerlerdiń týystary men ózge de tulǵalarǵa jeńildikti áýe bıletterin satý týraly málimetter bar. Atalǵan tujyrymdy tekserý maqsatynda Bas kólik prokýratýrasy Azamattyq avıatsııa komıtetine Air Astana men Fly Arystan qyzmetine tekserý júrgizý týraly talap joldady, — dep atap ótti vedomstvodan.