Bas kıimsiz judyryqtasqan qyzdar arasynda jaraqat alǵandar kóp – bas bapker

ASTANA. KAZINFORM – Qaraǵandyda áıelder boksynan ótip jatqan «Myqtylar týrnıri» tuńǵysh ret bas kıimsiz ótip jatyr. Keshe fınalıster anyqtalǵan bolatyn. Osyǵan oraı áıelder boksynan Ulttyq quramanyń bas bapkeri Eldos Saıdalınge habarlasyp, jańa erejeni sportshylar qalaı qabyldap jatqany týraly surap bilgen edik.

– Eldos Jánibekuly, «Myqtylar týrnıri» máresine jetýge jaqyn. Búgin chempıondar anyqtalady. Jalpy jarys qalaı ótip jatyr?

– Jarys óte joǵary deńgeıde ótýde. Bastalǵan alǵashqy kúnnen beri qaraı ár jekpe-jekti qadaǵalap otyrmyn. «Kim qalaı judyryqtasyp jatyr? Qaı boksshynyń jeńiske degen qulshynysy joǵary? Kim qandaı aıla-tásil jasady» barlyǵy jeke baqylaýymda. Búgin fınalda chempıondar anyqtalady. Ary qaraı jarysty qorytyndylap, qarashada Iordanııada ótetin Azııa chempıonatyna baratyn qyzdarymyzdy anyqtaımyz.

– Bas kıimsiz judyryqtasý boksshy qyzdarymyzǵa qıyndyq keltirmeı me? 

– Qyzdar birinshi ret bas kıimsiz judyryqtasyp jatyr. Sondyqtan bolar jekpe-jek barysynda jaraqat alyp qalǵandar kóp boldy. Bas kıimsiz judyryqtasqanda qalaı qorǵaný kerektigin áli jete túsinbegennen shyǵar dep oılaımyn. Azııa birinshiligine deıin osy turǵyda barynsha jumys atqaramyz. Jattyqtyrýshylarǵa da arnaıy tapsyrmalar berýde. Bas kıimsiz judyryqtasý áıel zatyna ońaı emes. Biraq, talap solaı boldy. Endi soǵan beıimdelip, jańa erejege baǵynýǵa týra keledi. Búgin boksshylardyń jaraqat alýynan keıin eki salmaqta fınaldyq kezdesýler bolmaıdy.