Bas ımamdar basqosýy elektrondy formatta ótip jatyr
ASTANA. 15 qańtar. QazAqparat - Qazaqstan musylmandary dinı basqarmasynyń aımaqtaǵy ókil ımamdary Bas múftı Erjan qajy Malǵajyulyna esep berip jatyr. Bul týraly muftyat.kz habarlady.
Óńirlerden kelgen 19 ókil ımam 2013 jyly atqarǵan izgi is-sharalar men júzege asyrǵan ıgi jobalar jaıly baıandaýda. Dástúrli esep berý rásiminde qoǵamǵa qaýipti dinı aǵymdardyń ıdeologııasyna tosqaýyl qoıý, shákirt tárbıeleý isi, ýaǵyz-nasıhat jumysyn jandandyrý, qoǵamǵa qajetti kitaptar men beınerolıkter ázirleý, dinı saıttardyń belsendiligin arttyrý, eldi ımandylyqqa úgittep, birlik pen yntymaqqa uıytý syndy birqatar mańyzdy máseleler talqylanyp jatyr. Bas ımamdar basqosýynyń bıylǵy ereksheligi - elektrondy formatta (beınerolık) ótýi. Kim ne istedi? Bári beınebaıan jáne sýretpen baıandalady. Bas múftı bas ımamdardy zaman talabyna saı jumys isteýge shaqyrdy. «Biz úntaspalar men beınerolıkterdiń sanyn kóbeıtip, ony barlyq óńirge jetkizýimiz kerek. Ýaǵyz aıtylmaǵan aýyl, aýdan, dinı aqparat jetpegen adam qalmaýy qajet. Halyqty tatýlyqqa shaqyrý, olardyń dinı saýatyn joǵary deńgeıge kóterýde siz ben bizge artylǵan úmit, júktelgen júk zor», - dedi Bas múftı Erjan qajy Malǵajyuly. «Jyldyq jumys qorytylǵan jıynda Astana qalasynyń bas ımamy Naýryzbaı Ótpenov «Áziret Sultan» meshitinde elimizde tuńǵysh ret ótkizilgen onlaın dáristiń máni men mańyzyna toqtaldy. Bir aıda respýblıka boıynsha 97 meshit onlaın júıesine qosylyp, tikeleı efırde ustazdardyń dárisin tyńdaýda. Tikeleı efırde tildesip, tolǵandyrǵan saýalyna jaýap alýda. Bul ıgi joba jalǵasa bermek»,-delingen QMDB málimetinde. Bas múftı jumys kórsetkishi ortasha jáne tómen deńgeıdegi oblys ımamdaryna qatań eskertý jasap, baǵyt-baǵdar men tıisti nusqaýlar berdi. Qaıyrymdylyq sharalardy jıi uıymdastyrý qajettigin qaperge saldy.
