Bas ekonomıst qaı mamandyqtardyń joıylatynyn aıtty
ASTANA. QazAqparat - QR Ulttyq ekonomıka mınıstri Tımýr Súleımenov tsıfrlandyrý aıasynda qaı mamandyqtardyń joıylatynyn boljady. Búgin xalyqqa esep berý kezdesýi kezinde oǵan osy máselege qatysty bir suraq tústi, dep xabarlaıdy QazAqparat tilshisi.
"Bul - óte mańyzdy suraq. Oǵan naqty jaýap berý qıyn. Degenmen, bir máseleni eskerý kerek. Álemde árbir memlekettiń damý deńgeıi ártúrli. Máselen, AQSh, Germanııa, Japonııa sııaqty elderde kóptegen óndiristik protsesterdi avtomattandyrsa, bizge ondaı ózgerister áli jetken joq. Demek, Qazaqstan, Reseı, Ortalyq Azııa elderinde jumys oryndarynyń jappaı qysqarý qaýpi tómen. Sondyqtan qandaı da bir fýtýrıstik materıaldardy oqyǵanda onyń bárin eldegi naqty jaǵdaımen salystyrý qajet-aq", - dedi T.Súleımenov.
Mınıstrdiń aıtýynsha, robottar adam kúshin almastyrsa da, adamnyń jeke qasıetterin eshbir robot almastyra almaıdy. "Sondyqtan kreatıvti oılaý, shablonsyz ıdeıa tabý, menedjerlik sheshim qabyldaý sııaqty qarym-qabiletterdi qajet etetin mamandyqtar eshqashan joıylmaıdy. Endi, keıbir ınjenerler, qaǵazbasty jumyspen otyratyn esepshiler men zańgerlerge suranys bolmaıdy deıdi. Mysaly, debıt pen kredıtti keltiretin esepshilerdi mashına almastyra alady dep oılaımyn. Al qarjylyq esepti ázirleıtin býxgalterler qalatyn shyǵar. Sebebi ondaıda kásibı daıyndyq qajet. Kompıýter ony isteı almaıdy", - dep atap kórsetti T.Súleımenov.
Aıta keteıik, búgingi kezdesý kezinde mınıstr baılyqqa salyq salý máselesine qatysty óz oıyn aıtty. Onyń aıtýynsha, jaqynda krıptovalıýta máselesi arnaıy keńestiń talqylaýyna shyǵarylady.
