Bas dırektory qaıta taǵaıyndalǵan Atyraý munaı óńdeý zaýyty qalaı jumys istep tur
ASTANA. KAZINFORM – Energetıka mınıstri Almasadam Sátqalıev Atyraý munaı óńdeý zaýytynyń bas dırektoryn qaıta taǵaıyndaýǵa qatysty pikir bildirdi.
«Atyraý munaı óńdeý zaýytynyń bas dırektoryn qaıta taǵaıyndaý týraly sot sheshimi bar, ol barlyq organdar úshin mindetti jáne oryndaldy. Jańa basshyǵa basqarý fýnktsııalaryn júzege asyrýda kómektesetin bolamyz. Al QazMunaıGaz kompanııasynyń korporatıvtik máselelerine qatysty máselelerge túsinikteme bergim kelmeıdi, bul kompanııa men onyń aktsıonerleriniń quzyretine jatady», - dedi Almasadam Sátqalıev Úkimet otyrysynan keıin ótken baspasóz máslıhatynda.
Sondaı-aq, mınıstr munaı zaýytynyń qazirgi jumysyna qatysty oıyn ortaǵa saldy.
«Kásiporyn jumys istep tur, aǵymdaǵy qyzmeti týraly esepterdi alyp otyrmyz. Atap aıtqanda, negizgi qondyrǵylardyń jumysy, kúndelikti munaı ónimderin óndirý týraly. Onyń ústine orynbasarlarym arasynda óńirlerdegi munaı óńdeý zaýyttaryna baryp turady. Aǵymdaǵy jaǵdaıdan habardar bolýǵa tyrysamyz», - deıdi vedomstvo basshysy.
Eske sala keteıik, Ǵalymjan Jýsanbaev bıyl 10 qańtarda Atyraý munaı óńdeý zaýytynyń bas dırektorlyǵyna taǵaıyndalǵan edi.
Alaıda, bir aıdan soń bas dırektor men bas ınjener arasynda daý týyndady.
Osyǵan baılanysty «QazMunaıGaz» UK tarapynan qurylǵan arnaıy komıssııa Atyraý munaı óńdeý zaýytyn tekserýdi bastady.
19 aqpanda Atyraý munaı óńdeý zaýytynyń bas dırektory Ǵalymjan Jýsanbaev pen bas ınjeneri Ádilet Shoshanbasov qyzmetinen bosatyldy.
22 maýsymda Ǵalymjan Jýsanbaev sottyń sheshimimen Atyraý munaı óńdeý zaýytynyń eks-dırektory jumysyna qaıta oraldy.
