Bas bostandyǵynan aıyrý túrindegi jazany atqarýdyń progressıvti júıesin engizý josparlanady - ІІM
ASTANA. QazAqparat - Qazaqstanda bas bostandyǵynan aıyrý túrindegi jazany atqarýdyń progressıvti júıesin engizý josparlanady.
Bul týraly búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysynda málim boldy. Onda jańa redaktsııadaǵy Qylmystyq-atqarý kodeksiniń jobasy talqylanǵan bolatyn.
QR Іshki ister mınıstriniń orynbasary Amantaı Kúreńbekovtiń aıtýynsha, Kodeks jobasynda eń aldymen bas bostandyǵynan aıyrý túrindegi jazany atqarý tetikteri jetildiretin bolady. «Bul rette jazany atqarýdy progressıvti júıe boıynsha engizý josparlanady. Mundaı júıeni qonys-kolonııalary men túrmelerde engizilýi kózdeledi. Jańa júıe eń aldymen sottalǵandardy ustaý jaǵdaıyn satylap ózgertýdi qarastyrady, eń bastysy olardyń quqyqtyq tártipke baǵynýshylyǵyna negizdelgen júris-turysyn yntalandyrady», - deıdi Amantaı Kúreńbekov.
Onyń aıtýynsha, osy jańa júıege sáıkes, bas bostandyǵynan aıyrylǵandar túrmelerde ustaýdyń ádettegi jaǵdaıynda jazalaryn óteı bastaıtyn bolady. Al keıinirek, júris-turysyna qaraı sottalǵandar ustaýdyń qatańdatylǵan nemese jeńildetilgen jaǵdaıyna aýystyrylady.
Budan bólek, Qylmystyq-atqarý kodeksi jobasymen sottalýshylardy minez-qulqyna, júris-turysyna baılanysty «oń» jáne «teris» dep jikteý kózdeledi. «Bunyń ózi tárbıe úderisine saralanǵan túrde qaraýǵa septigin tıgizbek», - deıdi ІІM orynbasary.
